3 persona janë arrestuar dhe një tjetër është shpallur në kërkim për shkak se kanë futur mallra kontrabandë në pikën kufitare të Kakavijës.
Personi që është shpallur në kërkim ka detyrë doganier në këtë pikë kufitare, ndërsa është arrestuar kolegu i tij Muharrem Mullai. Dy personat e tjerë që janë arrestuar janë Maksi Babi dhe Xhino Melonashi.
Në aksin rrugor Gjirokaster-Kakavijë është bërë e mundur ndalesa e nje mjeti ku gjatë kontrollit të ushtruar nga policia u gjet një sasi madhi redbulli dhe qumështi për të cilat nuk ishin paguar detyrimet doganor.
Nga hetimet rezultuan se doganierët në pikën doganore Kakavijë Muharem Mullai dhe Ardit Cani kanë marrë 400 euro dhe kanë lejuar kalimin e mjetit duke ju shmangur detyrimeve doganore. Pas këtij operacioni u sekuestrua makina dhe rreth 190 koli me pije energjike red bull si dhe 5 koli me qumësht.
Njoftimi i policisë për aksidentin:
Finalizohet me sukses operacioni policor i koduar “BEFASIA”.
Arrestohen në flagrancë tre shtetas, 1 prej të cilëve me detyrë doganier në Degën Doganore Kakavije.
Sekuestrohen mallra të ndryshme.
Në vijim të punës për goditjen e aktivitetit të kontrabandës së mallrave, specialistët e Seksionit për Hetimin e Krimit Ekonomik e Financiar në D.V.P. Gjirokastër organizuan dhe zhvilluan operacionin “BEFASIA”.
Si rezultat i këtij operacioni u arrestuan në flagrancë shtetasit :
M.B., 31 vjeç, banues në Devoll.
Xh.M., 28 vjeç, banues në Bilisht.
M.M., 60 vjeç, banues në Tiranë, (me detyrë doganier në Degën Doganore Kakavije).
Arrestimi i shtetasve të mësipërm u bë pasi:
Në aksin nacional Gjirokastër-Kakavije, shërbimet e Policisë kanë ushtruar kontroll në mjetin që drejtohej nga shtetasi M.B. dhe pasagjer shtetasi Xh.M., dhe gjetën një sasi mallrash të konsiderueshme me pije energjike dhe qumësht, për të cilat nuk kishin paguar detyrimet doganore.
Nga hetimet e kryera rezultoi se doganieri M.M. kundrejt një sasie parash ka lejuar që shtetasit M.B. dhe Xh.M. të kalonin mallrat në hyrjen e Republikës së Shqipërisë pa paguar detyrimet doganore.
Mallrat u sekuestruan në cilësinë e provës materiale.
Materialet i kaluan Prokurorisë pranë Gjykatës së Shkallës se Parë Gjirokastër për veprat penale “Kontrabanda me mallra të tjera”, ” Shpërdorimi i detyrës”, “Korrupsion pasiv i personave që ushtrojnë funksione publike” dhe ” Korrupsion aktiv i personave që ushtrojnë funksione publike”.
(E.K/Faxweb.al)
