Kryetari i Partisë Demokratike, Sali Berisha, zhvilloi një takim me eurodeputetin Michael Gahler, drejtues i Misionit të Vëzhgimit të Parlamentit Europian për zgjedhjet e 11 majit në Shqipëri dhe koordinator i EPP në Komisionin e Jashtëm të Parlamentit Europian.
Berisha falënderoi z. Gahler për përkushtimin ndaj zhvillimeve demokratike në Shqipëri dhe për drejtimin objektiv të misionit të PE, duke e cilësuar procesin zgjedhor si një farsë elektorale. Ai ngriti shqetësimin për situatën alarmante gjatë zgjedhjeve, ku liderët opozitarë u përballën me ndjekje penale të montuara, dhe denoncoi shpërdorimin masiv të burimeve publike për blerje votash.
Sipas opozitës, zgjedhjet u deformuan edhe nga përfshirja e grupeve kriminale, të cilat mbështetën kandidatë të Partisë Socialiste në disa qarqe. Berisha akuzoi qeverinë për bashkëpunim me rrjete kriminale që kontrollojnë portet, hekurudhat dhe pastrimin e parave përmes ndërtimit informal.
Një tjetër çështje kritike ishte manipulimi i votës së diasporës, ku sipas PD, është shkelur e drejta kushtetuese e qytetarëve jashtë vendit për të votuar.
Berisha theksoi se rezultati zgjedhor nuk pasqyron vullnetin e qytetarëve dhe paralajmëroi vazhdimin e betejës për transparencë e drejtësi, përmes dokumentimit të provave që do i përcillen institucioneve europiane.
Eurodeputeti Gahler garantoi se do të ndjekë me prioritet situatën në Shqipëri dhe do të mbështesë çdo përpjekje për përmbushjen e standardeve demokratike dhe kritereve të anëtarësimit në BE.
Në takim morën pjesë edhe Oerd Bylykbashi, Albana Vokshi dhe Jorida Tabaku.
