Kryeministri Edi Rama zhvilloi një takim pasditën e 29 marsit në Durrës në kuadër të programit “Bashkia që Duam”, por pavarësisht se Vangush Dako shprehu dëshirën për një rikandidim, kreu socialist nuk deklaroi ndonjë konfirmim siç ka bërë në disa bashki të tjera të vendit si ajo e Tiranës, Fierit, Lezhës, Kukësit etj.
Kryeministri përmendi punën e Dakos në krye të bashkisë duke shprehur vlerësime të mëdha, por pavarësisht se foli gjerësisht për zgjedhjet e qershorit, ai nuk dha asnjë sinjal nëse Dako do të rikonfirmohet apo jo (lexo këtu).
Ndërkohë gazeta “Bulevard” bën me dije se Vangjush Dako nuk do të kandidojë më për Bashkinë Durrës.
Mësohet se ky i fundit në një mbledhje të zhvilluar me strukturat e PS-së në Durrës, ka komunikuar vendimin e tij.
Sipas Dakos, tërheqja nga gara nuk ka të bëjë me akuzat në lidhje me blerjen e votave, të pasqyruara në dosjen 339.
“Objektivi ynë është që Partia Socialiste të dalë fitues në të treja Bashkitë e qarkut të Durrësit ku unë dhe gjithë strukturat e PS do të angazhohen për të drejtuar fushatën elektorale, pra në Durrës, Krujë dhe Shijak. Ato akuza më motivojnë më shumë që ti fitojmë të treja bashkitë e qarkut të Durrësit, pasi PS gëzon mbështjetje të gjerë nga populli”.
Ndërkohë për bashkinë e Durrësit ndryshe nga sa ka ndodhur me disa nga bashkitë më të mëdha në vend, ende nuk është prezantuar ndonjë kandidaturë zyrtare nga ana e Partisë socialiste.
(F.GJ/FXWEB.AL)
