Këshilli i Emërimeve në Drejtësi ka bërë sot pikëzimin dhe renditjen përfundimtare të pesë kandidatëve për Inspektoratin e Lartë të Drejtësisë.
Teksa në garë janë Artur Metani, Sokol Stojani, Joana Sorraj, Eris Hysi dhe Lindita Troja, KED ka vendosur që të parin në listë të lërë Artur Metanin, duke e vlerësuar me 89.6 pikë. Pas tij vjen Sokol Stojani, ndërsa në fund të listës qëndron Lindita Troja.
Njoftimi i plotë i KED:
Në zbatim të nenit 147/d pika 4 dhe nenit 149/d pika 1 të Kushtetutës, të nenit 199 pika 2, nenit 201 pika 2, nenit 239 dhe nenit 240 të ligjit nr.115/2016, si edhe të dispozitave të aktit nënligjor normativ Vendimi i Këshillit të Emërimeve në Drejtësi nr. 5 datë 02.04.2019 “ Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, Këshilli i Emërimeve në Drejtësi, në mbledhjen e tij të datës 23.12.2019, sipas rendit të përcaktuar të ditës, vendosi:
Të miratojë listën përfundimtare të renditjes së kandidatëve të lejuar për Inspektor i Lartë i Drejtësisë, shpallur nga Këshilli i Emërimeve në Drejtësi në datën 01.03.2019 dhe rishpallur për plotësimin e kandidaturave në datën 09.09.2019.
Të miratojë raportin për renditjen e kandidatëve të lejuar për plotësimin e vendit vakant të Inspektorit të Lartë të Drejtësisë, shpallur nga Këshilli i Emërimeve në Drejtësi në datën 01.03.2019 dhe rishpallur për plotësimin e kandidaturave në datën 09.09.2019. Lista do t’i dërgohet Kuvendit të Republikës së Shqipërisë, brenda tre ditëve, sipas parashikimeve të nenit 200 shkronja “ë” të ligjit nr. 115/2016.
Lista përfundimtare e renditjes:
- Artur Metani 89.6 Pikë
- Sokol Stojani 89 Pikë
- Joana Asimi Sorraj 82.2 Pikë
- Eris Hysi 78.3 Pikë
- Lindita Troja 63.4 Pikë
Dy vendimet e arsyetuara, raporti dhe aktet e tjera të pikëzimit të kandidatëve do të publikohen nesër në faqen zyrtare të Gjykatës së Lartë.
(M. I./ Faxweb.al)
Discussion about this post