Partia Demokratike pas rezultateve të zgjedhjeve të 25 Qershorit me 43 mandate në total të fituara do të duhet t’i hyjë një gare të brendshme për kreun e saj.
Pas humbjes shumë prej figurave në PD që mbetën jashtë listave shpërthyen kundër Bashës duke kërkuar largimin e menjëhershëm të tij nga drejtimi i Partisë.
Mirëpo kreu i demokratëve zgjodhi një rrugë të mesme, nuk dha dorëheqjen po ngriu të gjitha funksionet e tij si kryetar në mënyrë që t’i hapej rruga zgjedhjeve të drejtimit të Partisë.
Me këtë akt Basha konfirmon se ai do të jetë një nga kandidaturat për zgjedhjet që pritet të mbahen në 22 korrik.
Po ashtu jo më larg se mbrëmë ai u njoh me kundërshtarin e tij të parë për garën e kreut të partisë, Eduart Selami. Ky i fundit pavarësisht se nuk u kandidua në zgjedhjet e Qershorit nuk e sulmoi në mënyrë direkte Bashën gjatë muajit të fushatës edhe pse ka qenë përherë kundër vendimit për ta lënë PD-në jashtë Parlamentit.
Pavarësisht se Selami shihet si një figurë pozitive në PD ai nuk duket të ketë një lidhje të konsoliduar me strukturat e Partisë.
“Demokratë të nderuar, me ndjenjë përgjegjësie dhe synim për t’i rikthyer së bashku PD, lavdinë e merituar, shpall kandidaturën për Kryetar!”, shkruante mbrëmë Selami.
Ndërkohë që në ditët në vijim pritet të ketë edhe kandidatë të tjerë që të bëhen pjesë e garës për kryesimin e PD-së.
(E.K/SHUPLAKA)
Discussion about this post