Garda dhunon 53-vjeçarin, Blushi-Dinkos : Ndjesë që i kam mësuar Ramës rrugët e Korçës!

Pas dhunimit të qytetarit nga punonjësit e gardës dhe të policisë në Korçë, ka reaguar edhe Kreu i LIBRA-s, Ben Blushi.

Niko Dinko u dhunua nga policët, pasi ai hodhi disa parrulla kundës kryeministrit Rama. Madje edhe mbështeti Blushin në sy të tij.

“Poshtë Rama! Rroftë Ben Blushi! Ben Blushi, intelektuali i Korçës, do të ta hajë kokën ty”, ishin fjalët e 53-vjeçarit.

Pasi u informua për ndodhinë, Blushi i ka kërkuar ndjesë Dinkos edhe pse thotë se nuk e njeh atë.

“Ndjesë Niko Dinkos! Ky është Niko Dinko, një banor i Korçës të cilin nuk e njoh. E kanë rrahur sot në mesditë në furgonin e policisë pasi ka thirrur emrin tim ndërkohë që Edi Rama ecte në rrugë. I kërkoj ndjesë Niko Dinkos që ja kam mësuar rrugët e Korçës Edi Ramës. Siç thonë në Korçë, në vend që të baresë, lëshon qentë kundër bariut. Duro edhe gjashtë muaj Niko. Gëzuar Krishtlindjet!”, shkruan Blushi në Facebook. (D.D/Shuplaka)