Garë mes urbanëve të Kamzës, 6 pasagjerë plagosen nga përplasja

Një aksident ka ndodhur para pak minutash në Kamzë, ku të përfshirë janë dy mjete urbanë.

Thuhet se autobusët po bënin garë mes tyre për të marrë pasagjerët, ndërsa mësohet se janë 6 pasagjerë të plagosur dhe njeri nga shoferet ka qenë në gjendje të dehur.

Policia ka shkuar në vendngjarje dhe mësohet se janë marrë në pyetje drejtuesit e mjeteve.

Të plagosurit janë dërguar drejt spitalit, fatmirësisht jashtë rrezikut për jetën.

Në fakt për çdo qytetar që ka rastisur të udhëtojë të paktën njëherë me këtë linjë urbanesh, është ndeshur me sjelljen jo të mirë të faturinove apo drejtueseve të mjeteve. Për të mos folur pastaj për vonesat në stacione, ose kushtet teknike të mjeteve.

Policia thotë se:

Rreth orës 08:10, tek kthesa e Kamzës janë përplasur dy autobuza të linjës “Tiranë – Kamëz” me targë AA628 GC, me drejtues shtetasin K. A., 43 vjeç dhe me targë AA 958 LN, me drejtues shtetasin S. R., 40 vjeç.

Si pasojë e përplasjes janë dëmtuar lehtë dhe janë dërguar për ndihmë mjekësore në SQU shtetasit, A. P., 22 vjeçe, S. R., 43 vjeç, V. H., 23 vjeç, S. K., 53 vjeç, K. G., 19 vjeçe dhe E. L., 22 vjeçe ( të gjithë pasagjer në dy autobusat e linjës “Kamëz-Tiranë ).

Shërbimet e policisë dhe drejtuesit e autobusave ndodhen në vendngjarje, po kryhen veprimet e mëtejshme hetimore për zbardhjen e shkakut dhe rrethanave të përplasjes.

(E.K/FAXWEB.AL)