Nesër Komisioni i Veprimtarisë Prodhuese do të shqyrtojë dekretin e Presidentit Nishani për ligjin e mbetjeve. Mësohet se shqyrtimi i dekretit do të nisë rreth orës 12:00.
Miratimi i ligjit për importin e mbetjeve, pritet të bëhet sëshpejti fakt i kryer. Kujtojmë që në programin e punimeve të Kuvendit për periudhën 18 shtator-13 tetor 2017, është përfshirë edhe shqyrtimi i dekretit të Presidentit Nishani, që refuzonte dekretimin e amendamenteve që qeveria Rama i bëri ligjit të mbetjeve.
Kështu, kryeministri Edi Rama ka nxituar ta bëjë ligjin e importit të plehrave, pjesë e axhendës së Parlamentit, që në seancat e para. Pavarësisht shumë kontestimeve, më datë 17 tetor ligji për mbetjet pritet të votohet në Parlament.
Tanimë nuk do të kalojë më për dekretim te Presidenti Meta, duke qenë se ish-presidenti Nishani e ka kthyer njëherë projektligjin mbrapsh në Parlament më 14 tetor të 2016-ës.
Nga ana tjetër, sjellim ndërmend se pak ditë më parë në emisionin “Ekopolitikë”, kryetari i Komisionit të Veprimtarisë Prodhuese Eduard Shalsi tha se dekrati i Nishanit është i vdekur. Po ashtu Shalsi tha se me këtë ligj do të merret ministria e Energjisë dhe Infrastrukturës.
Po ashtu, kryeministri Rama tha pak ditë më parë në një intervistë për “Zërin e Amerikës” se ky projektligj do t’i rikthehet publikut për të parë se është një proces europianizues dhe modernizues, duke lënë të nënkuptojë kështu se qeveria nuk ka hequr dorë nga votimi i këtij ligji por se thjesht do të ketë debate për të para se ta dërgojë në Kuvend.
“Kryetari i grupit ka qenë i qartë, do ta rikthejmë në një diskutim të gjerë, për të cilin lloj-lloj sharlatanësh kërkojnë pikët e tyre duke mashtruar publikun. Ne do ta rikthejmë tek publiku për të parë se për çfarë bëhet fjalë, për të parë se bëhet fjalë për një proces europianizues dhe modernizues dhe për asgjë nga ato që thotë kazani mediatik”, tha Rama. (D.D/Shuplaka)
