Gazeta spanjolle shkrim për Klement Balilin: Mbrojtje nga politikanë të nivelit të lartë

Gazeta e famshme spanjolle “El Pais” i ka kushtuar një artikull më të kërkuarit në Shqipëri, Klement Balili, i ashtuquajtur “Eskobar i Ballkanit”.

Në hyrje të këtij artikulli Saranda është cilësuar si qyteti i “panjohur” i Shqipërisë, i cili ndodhet vetëm dy milje detare larg ishullit grek të Korfuzit. 

“Bie në sy vargu i hoteleve dhe apartamenteve turistike, të cilat gëlojnë gjatë sezonit turistik të verës. Por muajt e fundit Saranda nuk ka tërhequr vëmendjen si një destinacion pushimi. Qyteti është kthyer në epiqendrën e një rrjeti të trafikimit te drogës dhe kapiteni është një farë Klement Balili. Dikur drejtor i Transportit të Sarandës, i dyshuar për  lidhje të forta  me sferat e larta politike dhe administrative të vendit”, thuhet ndër të tjera në hyrje të shkrimit.

“El Pais” citon edhe mediat greke, të cilat e kanë quajtur Balilin si “Pablo Escobar i Ballkanit”. 

Sipas CNN grek, ai ka gëzuar mbrojtje të veçantë dhe “kontakte me politikanë të lartë”, ndërkohë Ministri i Brendshëm i Shqipërisë u cilësua si një nga rojet e Balilit.

Në shkrim përmendet edhe dosja porej 10.000 faqesh për aktivitetet e Balilit, ndërsa nuk anashkalohe as vizita e kreut të CIA-s, John Brennan në Tiranë.

“Kjo vizitë  interpretohet si një mesazh i fshehur ndaj autoriteteve shqiptare për të bashkëpunuar në operacionet ndërkombëtare kundër trafikut të drogës. Pavarësisht bastisjeve të policisë Balili vazhdon të jetë i humbur. Nga të gjitha profecitë për stabilitetin në Ballkan mbetet ende shumë për të dalë nga bataku gjeopolitik”, shkruan “El Pais”.

Klement Balili është në kërkim policor prej disa javësh në Shqipëri. Edhe pse thuhet që ai nuk ka dalë jashtë vendit sërish ndalimi i tij duket një mision i pamundur.

Prokuroria e Krimeve të Rënda ka dhënë për Balili masën e sigurisë “arrest me burg” me akuzën e trafikut ndërkombëtar të narkotikëve. (A.R/SHUPLAKA)