Gazetari Çollaku për largimin e Tahirit në Gjermani: Rasti i vetëm në planet! Tërheqja e pasaportës nga Prokuroria duhet të ishte një masë paraprake

Reagon ashpër gazetari që investigoi e solli dëshmi të forta për bashkëpunimin e Tahirit me grupin e Habilajve, Basir Çollaku.

”Rasti i vetëm në planet! Tërheqja e pasaportës nga Prokuroria duhet të ishte një masë paraprake”, theksoi gazetari pas informacionit të konfirmuar se Saimir Tahiri ka dalë nga vendi, edhe pse është në hetim penal dhe ndodhet në Gjermani. Sipas tij nuk ka patur dijeni as prokuroria, as avokati, përveç Tahirit që është larguar.

”Këto persona kanë bashkëpunuar me ish-ministrin e Brendshëm dhe besoj është personi i vetëm në planet që hetohet dhe shëtit në BE sikur drejton hetimin dhe jo sikur është i akuzuar.”,  tha Çollaku, duke shtuar se prokuroria është institucioni që përfaqëson shtetin, hetimin, dhe çmonte se mosveprimi i saj ka sjellë dëmtimin e mëtejshëm të hetimit.

”Në një deklaratë Rama ka theksuar se ”ne nuk do ta lejojmë Tahirin të dalë jashtë vendit”. Tërheqja e pasaportës nga Prokuroria duhet të ishte një masë paraprake. Edhe kontrolli që iu bë në banesë me 2-3 javë vonesë është veprim komik.”, tha më tej Çollaku.

Gazetari dha detaje edhe për kërkesën e prokurorisë ndaj gjykatës për mosekstradimin e Nazer Seitit.

”Prokuroria ka dashur ta mbajë Seitin këtu. Vazhdojnë të vijnë dokumentet e dosjes, materiale të reja që prokuroria i ka vënë gjykatës për mosekstradim, ka informacione si punonte ky grup, eksportimin e lëndës narkotike në Siçili.”, u shpreh më tej, duke dhënë disa detaje nga përgjimet:

”Një gjë interesante është që ata flasin për emra konkretë, që u kanë marrë disa ngarkesa, i kanë humbur me 700 kg, 1 ton…përmendin emra që kanë bashkëpunuar, janë klientët e tyre, u kanë dhënë farën, tani u marrin drogën dhe e eksportojnë në adresa me organizata të tjera kriminale në Itali.

Është edhe taksa që i paguajnë, unë do të thotë autoriteteve të larta në qeveri.

Në një moment financieri i grupit i thotë për punët e mëtejshme të trafikut të drogës, unë nuk prek asgjë me dorë, paguaj vetëm para.

E ka idenë ai se sa para paguhen atje lart që punët të ecin fjollë…me qetësi dhe dashuri siç thonë ata, dhe këta deklarojnë ata që paguajnë.”, tha mes të tjerash Çollaku.

(V.G/Faxweb)