Jashtë ambienteve të bashkisë së Tiranës, qytetarë dhe aktivistë të shoqërisë civile, janë ngritur në protesta për të kundërshtuar rritjen e çmimit të ujit të pijshëm në kryeqytet.
Kësaj proteste duket se i është bashkuar edhe gazetari Armir Shkurti, i cili shprehet me ironi: “Kaq budallenj jemi gjithësej që s’duam rritjen e ujit!! Të tjerët janë të kënaqur dhe janë në shtëpi…”. Ai publikon edhe një foto ku tregon pjesëmarrësit në protestë.
Kujtojmë se kryebashkiaku Erion Veliaj ka kërkuar që të rrisë çmimin e ujit të pijshëm, pasi sipas një projekti të tij, kështu mund të sigurojë që brenda dy viteve t’i sigurojë Tiranës shërbim 24 orë me ujë të pijshëm.
Mirëpo këshilltarët e PD-së e kanë kundërshtuar këtë vendim, po ashtu edhe ata të LSI-së, vetëm një ditë më parë i vunë Veliajt 2 kushte për rritjen e çmimit të ujit: Rimbursim të familjeve në nevojë si edhe diferencim të bizneseve i madh apo i vogël.
Gjatë ditës së sotme, para mbledhjes së Këshillit Bashkiak, Veliaj ka pranuar kushtet e LSI-së dhe ka vendosur t’i diskutojë gjatë mbledhjes ku pritet të miratohet rritja e çmimit të ujit të pijshëm. (D.D/Shuplaka)
