Gazetari Erl Murati ka reaguar së fundi lidhur me protestat e banorëve të Astirit, kundër prishjes së shtëpive të tyre në kuadër të projektit të Unazës së Madhe.
Murati shkruan se çështja e banorëve të Unazës së re nuk është ligjore, sa kohë që në vendin tonë ka rreth 450 mijë ndërtime të paligjshme, ku mes tyre renditen dhe rezidencat ku jetojnë deputetët e Kuvendit.
Sipas tij zgjidhja është shumë e thjeshtë për strehimin e banorëve: politika të mos vjedhë, dhe ndërtohet edhe unaza edhe shtëpitë sociale për protestuesit.
“Nëse kemi të bëjmë me problem ligjor, atëherë duhet të shemben të gjitha komplekset rezidenciale ku jeton e 2/3 e deputetëve të parlamentit, sepse ato janë ngritur jo mbi tokë truall, por mbi ullishte, fusha bujqësore dhe kodrat e kurorës së gjelbër të Tiranës”, shkruan mes të tjerave gazetari.
Reagimi i plotë Muratit:
Çështja e banorëve të Unazës së Re nuk është problem ligjor, sepse në Shqipëri janë 450 mijë ndërtime TE PALIGJSHME.
Problemi është mbi të gjitha social: të gjithë e duam mbikalimin e “Shqiponjës”, por ai s’mund të ndërtohet duke hedhur 2 mijë njerëz në rrugë. Shteti duhet t’u japë zgjidhje atyre, pastaj të ndërtojë veprën publike.
Nëse kemi të bëjmë me problem ligjor, atëherë duhet të shemben të gjitha komplekset rezidenciale ku jeton e 2/3 e deputetëve të parlamentit, sepse ato janë ngritur jo mbi tokë truall, por mbi ullishte, fusha bujqësore dhe kodrat e kurorës së gjelbër të Tiranës.
Do të mjaftonte vetëm 1/10 e shumës së tenderit, pra vetëm 4 milionë euro për të ndërtuar dhe strehuar në banesa sociale të gjithë hallexhinjtë e Unazës së Re. Mjafton që politika të mos vjedhë: edhe Unaza ndërtohet, edhe banorët strehohen.
(E.K/FAXWEB.AL)
Discussion about this post