Arrestimi i kreut të AAK-së dhe ish-kryeministrit të Kosovës, Ramush Haradinaj ka sjellë shumë reagime nga Kosova dhe jo vetëm.
Më i fundit është gazetari i njohur Salih Kabashi, sipas të cilit, “Haradinaj është metafora e Kosovës së sotme, shtet i paqenë dhe karikatural”.
Me këtë arrestim, sipas Kabashit, Serbia tregon se është më e fortë se Kosova dhe Shqipëria bashkë.
Postimi i plotë i Salih Kabashit:
“Ramushin e tërheqin për veshi, Kosovës i japin një shuplakë
Nuk është aspak befasi ndalimi i Ramush Haradinajt, një herë në Slloveni, tash edhe në Francë, sikurse nuk është aspak e rëndësishme nëse do ta lënë të lirë apo do ta mbajnë në parandalim apo paraburgim.
Ramush Haradinaj është një figurë politike me të cilën tallet shumëkush dhe të cilën më së shumti e tall ai vetë.
Haradinaj është metafora e Kosovës së sotme, shtet i paqenë dhe karikatural.
Edhe ndalimi i sotëm i Haradinajt tregon se Serbia në të gjitha fushat është më e fuqishme dhe më e autoritetshme jo vetëm se Kosova, por edhe se Kosova e Shqipëria së bashku.
Kosova sonte mori një shuplakë. Haradinaj mund të hajgaredinojë sa të dojë dhe të vazhdojë me ëndrrat për veten kryeministër.
Realiteti është ky: dy tri kontrolle kufitare evropiane do ta lënë të kalojë, derisa në një kufi, s’është me rëndësi, në të tretin, të katërtin apo të dhjetin do ta ndalojnë.
Sa për t’ia tërhequr veshin atij dhe për t’ia ulur bishtin krekosësve të pushtetit në Prishtinë“.
Ramush Haradinaj u ndalua ditën e sotme në Francë. Arsyeja është një urdhër-arrest i lëshuar nga Serbia në vitin 2004. Për të një arsye Haradinaj u ndalua edhe në vitin 2015 në Slloveni. (A.R/SHUPLAKA)
Discussion about this post