Gazetari Sokol Shameti reagon pas deklaratës për shtyp të drejtoreshës së Bibliotekës Kombëtare Persida Asllani, për zjarrin e sotëm.
Sipas Shametit, në fjalët e Asllanit përpara gazetarëve ka një mendjelehtësi budallaqe. Kjo sepse sipas tij drejtoresha është munduar të qetësojë situatën duke nënkuptuar se librat e djegur janë në njëfarë mënyre pa vlerë.
“Ka një mendjelehtësi budallaqe te deklarata “qetësuese” e drejtoreshës së Bibliotekës Kombëtare se “librat e djegur ishin pa vlerë”.
1) Nëse librat ishin pa vlerë, atëherë drejtoresha duhet të japë llogari se përse mban libra pa vlerë në Bibliotekë dhe i shpërdoron paratë tona publike për ta.
2) Nëse librat ishin me vlerë (ashtu siç është realisht çdo libër), atëherë drejtoresha duhet të japë llogari se përse e quan të pavlerë punën që e kemi vënë të bëjë dhe të hapë krahun për ndonjë personalitet të mirëfilltë që ia di vlerën librit.”, shkruan Shameti.
Gjatë mesditës së sotme, Asllani doli në një deklaratë për shtyp, për të informuar mbi incidentin e sotëm në Bibliotekën Kombëtare e cila u përfshi nga flakët.
“Sot rreth orës 10 e 40 minuta u sinjalizua me sirena ekzistenca e një varte zjarri. U morën masa nga Zjarrfikësit nga Policia e Shtetit dhe nga Emergjencat Civile. U bë e mundur evakuimi. Vetëm një prej punonjësve shfaqi probleme shëndetësore dhe është jashtë rrezikut për jetën.
Deri më tani nuk na rezulton që të jenë prekur të dhëna të rëndësishme, në kushtet aktuale është ende herët për të dhënë dëmet konkrete materiale. E rëndësishme është që sistemi ka funksionuar. Emergjenca civile, specialitët, Policia e Shtetit dhe zjarrfikësja, kanë bërë të mundur shuarjen e zjarrit.
Presim një raport zyrtar profesionistësh. Pjesa e arkivit të shkrimve të rralla është e paprekur. Duhet të kemi parasysh që dixhitalizimi i jep rëndësi vlerave të rralla. Unë i besoj shumë gjuhës profesionale dhe ekipi pasi të përfundojë punën dhe do të na jap një komunikim zyrtar”, u shpreh drejtoresha.
Zjarri ka përfshirë katin e nëndheshëm të Bibliotekës Kombëtare në kryeqytet. Konkretisht, në katin ku ndodhet Antikuarët dhe librat e vjetër. Dyshohet se shkak është bërë një shkëndijë elektrike. (D.D/Shuplaka)
