Siç është bërë traditë tashmë çdo fundviti kryeministri Edi Rama zhvilloi ditën e djeshme një takim me gazetarët. Por ndryshe nga vitet e shkuara takimi festiv nuk u zhvillua në Pallatin e Brigadave, por në kryeministri.
Siç raportojnë të pranishmit në event, gazetarët nuk janë lejuar të futen me celularë, ndërsa kryeministri dhe stafi i tij e kanë mbajtur “të fshehtë” këtë takim. E gjithë kjo atmosferë ka sjellë edhe reagimin e gazetarëve, të cilët përmes postimeve në rrjetet sociale ironizojnë festën kryeministrore.
Një prej tyre është edhe gazetarja e TV Klan, Elja Zotka, e cila në pamundësi për të gjetur foto të tjera nga ky takim i gëzohet vetëm njërës prej tyre.
“Besoj se kjo foto do publikohet tek rubrika Amarcord pas ca vitesh se është ndër të paktat foto të dala nga festa e kryeministrit me mediat. Të lumshin duart Blerta Kambo”, shkruan gazetarja e TV Klan, postim që është vijuar nga komente të tjera ironizuese nga gazetarë të tjerë.
Por nuk ka munguar në komente as zëdhënësja e ish-kryeministrit Sali Berisha, Erla Mëhilli që shkruan: “S’ka gjë se ke me shumicë nga koha e Berishës”.
Nga fotoja që ka postuar gazetarja Zotka bien në sy edhe detaje të tjera. Të gjithë gazetarët kanë qëndruar në këmbë, me gota në duar, ndryshe nga vitet e shkuara kur për gazetarët shtroheshin darka plot sharm në Pallatin e Brigadave. Ndërsa bie në sy edhe mungesa e gazetarit të njohur Blendi Fevziu, i cili ka qenë i pranishëm në shumicën e takimeve të mëparshme të kryeministrave me gazetarët. (A.R/SHUPLAKA)
Discussion about this post