Ministri i Jashtëm grek Kotzias ka rrëzuar ditën e djeshme deklaratat e kryeministrit shqiptar Edi Rama dhe ministrit Ditmir Bushati.
Në fillim Rama dhe më pas Bushati thanë se në takimet dypalëshe me Greqinë ishte diskutuar dhe çështja çame.
Mirëpo përmes një sqarimi të opinionit publik, Kotzias është shprehur se nuk ka pasur asnjë diskutim për çështjen çame dhe se ajo nuk ekziston as si çështje.
Ai është shprehur se bisedimet janë fokusuar tek çështjet e mbetura pezull dhe mosmarrëveshjet në 70 vitet e fundit.
“Nuk ekziston çështja çame dhe nuk ishte temë e diskutimit mes dy palëve. Bisedimet me ministrin Bushati u përqendruan në çështje të pazgjidhura në 70 vitet e fundit dhe kemi përparuar për gjetje të zgjidhjeve të qëndrueshme. Ka përmirësim në marrëdhëniet greko-shqiptare nga dialogu i vazhdueshëm”- ka thënë Kotzias, njofton gazeta greke ‘Kathimerini’.
Mbetet e paqartë nëse në lidhje me këtë temë kanë gënjyer kryeministri dhe ministri shqiptar, apo ka bërë kthesë Greqia zyrtare. Rama dje shprehej se çamët do të mund të lëvizin të lirë drejt Greqisë, dhe se do të kenë akses të drejtë ligjor për pretendimet për pronat.
‘’Dua po ashtu të vë në dukje se jemi në një moment jashtëzakonisht pozitiv në dialogun tonë me Greqinë. Siç e shprehu publikisht kryeministri grek, pajtohem me të se nënshkrimi i një marrëveshje është shumë afër.
Duhet të presim marrëveshjen e shkruar të kësaj serie dialogu, duke filluar që te ligji absurd i luftës, deri te marrëveshja për kufirin detar, apo garantimi i të gjithë qytetarëve shqiptar, sidomos atyre që i përkasin komunitetit çam, për të pasur lëvizje të lirë e të pandikuar nga e shkuara, dhe për të pasur një akses ligjor për pretendimet e tyre në lidhje me të drejtën e pronësisë”, u shpreh dje Rama.
(E.K/FAXWEB)
