Pas publikimit të lajmit se sulmuesi nigerian i Apolonisë, Efijong Ejoh, ka fituar gjyqin në FIFA me Turbinën për shumën e 3623 eurove, ka ardhur reagimi i kreut të klubit cërrikas. Presidenti Gentjan Gjoka pohon se në të tilla raste, kur bëhet fjalë për shuma të vogla, FIFA i jep të drejtë lojtarit dhe kjo është diçka që nuk shkon, sipas tij.
Gjoka sulmon ndërkohë futbollistin afrikan, aktualisht pjesë e Apolonisë, duke e quajtur një maskara që nuk meriton asnjë lek për sjelljen prej rrugaçi që ka pasur. “FIFA nuk i merr në shqyrtim fare këto raste me shuma kaq të vogla, por i kalon automatikisht në favor të lojtarit, pa asnjë përfillje për klubet. Është e padrejtë kjo botë e futbollit ku ne bëjmë pjesë.
Ky person (Ejoh) është lojtari më maskara që kam pasur për 16 vjet që drejtoj ekipin. Lojtarë të huaj te Turbina kam pasur shumë, madje edhe emra shumë të njohur në kampionatin e Superiores, lojtarë si Sisoko, Bokotola, Akamba, Dosantos dhe shumë të tjerë, por të tillë monstër s’më kishte ndodhur të kisha ndonjëherë. Kam paguar te një restorant 30 mijë lekë në ditë për ushqimin e tij, plus shtëpinë ku banonte.
Dhe një pleh i tillë arrin të njollosë emrin e klubit tim, pavarësisht se ajo shumë është simbolike. Nuk i takon t’i japësh lekë këtij rrugaçi, një lojtar që s’vinte në stërvitje dhe që më ka bojkotuar mbi tri ndeshje zyrtare. Kam mandatet e bankës që lojtari është i paguar, por ne s’kemi njerëz që të na mbrojnë në këto raste. Edhe juristin e federatës e kemi lajmëruar, por FIFA këto lloj çështjesh i kalon në favor të lojtarit.
Nuk diskutohet që do t’ia bëjmë pagesën, sepse nuk e prishim imazhin e familjes sonë dhe të klubit për këtë shumë. Por një diskreditim në gazetën tuaj duhet ta ketë ai lojtar, se nuk meriton asnjë lek”, shprehet për “Panorama Sport” mjaft i indinjuar presidenti i Turbinës, Gentjan Gjoka. Një telash më shumë në këtë moment, kur skuadra duhet të jetë e përqendruar për të siguruar qëndrimin në Kategorinë e Parë.
Discussion about this post