Gjendet një makinë e djegur në Kodër-Rrëshen, çfarë u zbulua në të

Një  makinë është gjetur e djegur në zonën Kodër-Rrëshen, në Mirditë.  Makina e djegur dyshohet se është përdorur nga autorët e vrasjes që ndodhi mesditën e sotme në qendër të Rrëshenit, ku u ekzekutua në sy të fëmijëve, 48-vjeçari Armando (Tonin) Gjini.

Po ashtu në makinë është gjetur edhe një armë kallashnikovi, që dyshohet se është kryer vrasjen.Nga verifikimet e para, konstatohet se makina është me targa të vjedhura.

Rrësheni u trondit mesditën e sotme, pasi 48-vjeçari Tonin Gjini, u ekzutuan me breshëri plumbash në makinë, në të cilën ndodheshin edhe fëmijët e tij.

Ngjarja në Rrëshen

Fax News ka siguruar pamjet e makinës në të cilën u vra pak para mesditës së sotme Armando (Tonin) Gjini, në mes të qytetit të Rrëshenit.

Makina në të cilën ndodhej Gjini, së bashku me dy fëmijët e tij është bërë shoshë nga plumbat, ndërsa dyshohet se autorët kanë qenë vrasës profesionistë, pasi fëmijët nuk kanë pësuar asnjë dëm.

Disa prej plumbave e kanë kapur 48-vjeçarin në kokë, nga xhami i pasmë i mjetit.

Gjini ka ndaluar makinën, teksa gruaja e tij ka shkuar për të blerë diçka në dyqan dhe në ato momente është ekzekutuar.

Ende nuk bëhen të ditura shkaqet e ngjarjes së rëndë, ndërkohë që policia është vendin e ngjarjes dhe po punon për kapjen e autorëve.

Po kush është Armando Gjini?

Armando Gjini, është i njohur për drejtësinë si pjesë e grupit të Met Kananit. 48-vjeçari u arrestua vitin e kaluar në datë 12 maj si pjesë e grupit të baronit të drogës, Met Kanani, dhe qendroi në burg për rreth një vit.

Vitin e kaluar në kuadër të operacionit ‘Precizioni’ Gjini u arrestua së bashku me 37 persona të tjerë, ndërsa u sekuestruan 8 ton drogë.

Met Kanani njihet nga mediat turke si “Eskobari shqiptar” për shkak të famës që ai ka marrë atje si koka e një rrjeti të madh të trafikut të lëndëve narkotike përfshirë edhe heroinë e kokainë.

Nga operacionet e zhvilluara më herët edhe në Itali, Greqi, Turqi e Shqipëri, bandës i është sekuestruar mbi 8.4 ton kanabis me vlerë tregu 10 mln euro.

Njoftimi i policisë për vrasjen e sotme: 

Në qytet Rrëshen, në rrethana ende të paqarta, është vrarë me armë zjarri shtetasi A.Gj. vjeç 48, banues në  Rrëshen.

Grupi hetimor në vendngjarje vazhdon hetimet për zbardhjen e plotë të rrethanave të ngjarjes.

Janë ngritur pika kontrolli  si dhe po bëhet krehja e zones me qëllim kapjen e autorit.

(M.Q-E.K/Faxweb.al)