Ministria e Mbrojtjes në Greqi mësohet se ka kërkuar dënim maksimal për shtatë ushtarët grekë që bënë gjestin e shqiponjës. Zyra e Shtypit të ministrit Panos Kamenos ka kërkuar dënimin e tyre si asnjëherë më parë me qëllim që këto gjeste të mos përsëriten më.
Burime të kësaj ministrie bëjnë me dije se 7 ushtarët që bënë me duar simbolin e Shqipërisë e që më pas e postuan atë në rrjetet sociale, janë ndaluar dhe shoqëruar në ambientet e repartit ku dhe u pyeten lidhur me veprimin e kryer.
Bëhet e ditur se atyre u janë konfiskuar edhe telefonat celularë me urdhër urgjent të Ministrisë së Mbrojtjes. Çështja ka marrë përmasa të mëdha, më tepër për shkak të reagimeve të shumta mediatike dhe të politikës greke.
Shtatë ushtarët që do të dërgohen në regjimentin e Janinës, do të merren në pyetje nga Prokuroria e Janinës në cilësinë e të pandehurve.
Ushtarët grekë me origjinë shqiptare u fotografuan brenda një reparti ushtarak në Mesologji të Greqisë teksa bënin gjestin e shqiponjës dy krenare. (XH.A/SHUPLAKA)
