Dita e sotme në orën 18:00 do të vërë përballë dy nga skuadrat më të mira të momentit në Superligë, Skëndërbeun dhe Kukësin. Kur të gjithë prisnin që në konferencën e zakonshme për media para ndeshjes me Skënderbeun të dilte trajneri Ernest Gjoka siç ishte lajmëruar, një gjë e tillë nuk ka ndodhur. Zyrtarisht u fol për një mosrakordim oraresh, pasi dalja e trajnerit u anulua vetëm pak minuta para se konferenca të niste, por realisht nuk ka qenë kështu.
Burime të “Panorama Sport” pranë klubit verilindor kanë bërë me dije se konferenca e Gjokës është anuluar me urdhër të presidentit Safet Gjici. Numri një i klubit është nervozuar kur ka marrë vesh se trajneri do të dilte para mediave, kur gjatë kësaj jave pjesëtarë të skuadrës, madje dhe vetë tekniku një ditë më parë ka qenë prezent në një media vizive. Sipas Gjicit, një tjetër prononcim i tij do të ishte i tepërt.
Duke qenë se sfida ndaj Skënderbeut ka një rëndësi të madhe, Gjici ka vendosur që deklarata e trajnerit të mos zhvillohej, duke qenë se ndjeshmëria është e madhe. I gjithë opinioni sportiv është i përqendruar te kjo ndeshje, e cila, sipas presidentit, duhet të përgatitet e qetë, pa polemika apo batuta, duke mjaftuar ato që ai vetë ka zhvilluar me homologun e Skënderbeut, Ardjan Takaj.
PËRGATITJET
Duke parë situatën e krijuar dhe praninë e mediave, klubi ka lejuar kapitenin Rrahman Hallaçi që të komentojë këtë sfidë delikate. “Mendoj se e kemi përgatitur këtë ndeshje për ta fituar. Skënderbeu është një skuadër shumë e fortë dhe sigurisht që nuk do ta lëmë të jetë afër nesh.
Kuptohet, edhe barazimi nuk do të ishte keq, por ne duam maksimumin. Është momenti i duhur që ne të tregojmë vlerat tona dhe forcën e karakterit në transfertë. Deri tani nuk kemi treguar sa duhet, por në këtë moment skuadra i ka të gjitha mundësitë për ta treguar veten”, u shpreh mbrojtësi para nisjes drejt qytetit juglindor.
Discussion about this post