Ministri i Infrastrukturës dhe Energjitikës Damian Gjiknuri ka dalë nga Prokuroria e Krimeve të Rënda ku ka dëshmuar në lidhje me hetimet për abuzime që po zhvillohen në lidhje me rrugën Tiranë-Elbasan.
Gjiknuri në një prononcim të shkurtër për mediat ka thënë se kishte dëshmuar në rolin e kallëzuesit dhe pret që të bëhet drejtësi dhe hetimi të përfundojë me sukses, por nuk merr rolin e prokurorit.
“Uneë nuk jam këtu për të bërë hetime, i kam bërë në auditin tim, isha në cilësinë e personit kallëzues dhe dhash shpjegimet e mia, pres që hetimi të përfundojë me sukses”, tha ai.
Abuzimet me rrugën Elbasan-Gjinar kanë lënë prapa hekurave 4 zyrtarë të lartë të qeverisë shqiptare, mes tyre dy ish-drejtorët e ARRSH-së, Andi Toma dhe Dashamir Xhika.
Dëmi i shkaktuar shtetit nga abuzimet është 54 milionë dollar. Ka qenë vetë Gjiknuri ai që ka kërkuar hetimet për rrugën Tiranë-Elbasan.
Pas arrestimit të tre ish-zyrtarëve të ARRSH dhe dëshmive të ish-ministrave si Edmond Haxhinasto dhe Sokol Dervishaj, Gjiknuri është ministri i 3-të i Transporteve që u pyet në organin e akuzës.
(B.H/Faxweb)
Discussion about this post