Ministri i Energjisë dhe Industrisë, Damian Gjiknuri bashkë me kryebashkiakun e Vlorës, Dritan Leli, iu bashkuan në Vlorë nismës së shoqërisë civile duke firmosur peticionin në mbështetje të reformës në drejtësi dhe vetingut.
Teksa e cilësoi këtë një lëvizje popullore në mbështetje të reformës në drejtësi, ministri u shpreh se firmosja është një akt jo vetëm si politikan por edhe thjesht si një qytetar.
Populli shqiptar po e kupton përditë. Të gjithë politikanët më të lartë të Bashkimit Evropian dhe partnerët ndërkombëtarë po e theksojnë se rruga e vetme për Shqipërinë evropiane është reforma në drejtësi dhe procesi i vetingut. Populli ka një nevojë ulëritëse për drejtësi dhe ky është momenti historik që për drejtësi, të bëhet reforma e drejtësisë, të bëhet procesi i vetingut dhe Shqipëria të integrohet në Bashkimin Europian e ky është kushti i vetëm.”, tha Gjiknuri.
Duke quajtur reformën në drejtësi pengesën e fundit drejt rilindjes së vërtetë të vendit, Ministri i Energjisë dhe Industrisë, Damian Gjiknuri, theksoi se çdo lëvizje tjetër në tendë apo jashtë tendës që mundohet ta pengojë këtë proces ka dalë përpara rrugës së popullit. (XH.A/SHUPLAKA)
