I ftuar ditën e sotme në Fax News ishte analisti Endri Tafani. Për gazetarin Albi Rakip ai komentoi situatën e fundit politike në vend, mes aksionit opozitar për bllokimin e seancave plenare dhe të komisioneve parlamentare.
Tafani thotë se gjithnjë e më shumë njerëzit po largohen nga aksioni i Rithemelimit, pasi përqëndrimi është shumë i madhe tek çështja e Berishës, ndërkohë që hallet e njerëzve janë të tjera.
Tafani shton se opozita nga ana tjetër, nuk ka figura që të mobilizojë njerëzit përveç Berishës. Edhe ish-kryeministri tashmë nuk po mundet të mbledh njerëz.
“Në këtë periudhë të përqëndrohesh shumë tek çështja e Berishës dhe të merresh jo shkelja e kësaj, jo shkelja e asaj. Është fjalor që nuk prek ndonjë temë tek shqiptarët. Për shqipëtarët, si të thuash Berishën po e dënojnë me të drejtë apo pa të drejtë nuk është se ndryshon diçka, duke u përqëndruar këtu po shkëputet nga populli vihet re edhe tek mangësia që ka në numra, tek personat që shkojnë ditë pas dite atje tek rrugica. Kjo mangësi në numra vjen edhe për shkak se nuk kanë element tek PD përveç Berishës që të mobilizojë njerëz. Ata njerëz… Berisha në fillim kur bëri foltoren mbushi stadiumin dhe më pas në protesta. Por kur u fut brenda nuk ka asnjë person tjetër të mobilizojë njerëz. Ky është një problem shumë i madh që ka opozita sepse nuk ka njerëz që të mobilizojë njerëz”, thotë Tafani.
I pyetur nga Albi Rakip, nëse munden emrat e vjetër në PD të mbledhin dhe të mobilizojnë njerëz, Tafani shprehet se nuk munden, pasi janë figura të konsumuara së bashku me Berishën.
Po këta emra të vjetër a mund ta bëjnë?
“Nuk e kanë. Pse nuk e kanë? E para figurat në vetë PD, Berisha në fillimet ka qenë shumë i ashpër me kundërshtarët brenda partisë, kujtojmë grupin e Gramoz Pashkos me Teodor Kekon dhe në PD janë larguar individë që mund të kenë pasur ambicie të drejtojnë partinë një ditë. E dyta që fakti janë persona që kanë 30 vjet në politikë, konsumi politik është i njëjtë si për Berishën si për ata”, shtoi ai.
