Gjykata e Posaçme ka dënuar me 10 muaj burg Aleksandër Lahon, i njohur ndryshe si “Rrumi i Shijakut”, për akuzën e korrupsionit. Prokuroria e Posaçme kishte kërkuar një dënim prej 3 vitesh, por gjykata e ka dënuar me 1.3 vite burg, nga ku, për shkak të gjykimit të shkurtuar, dënimi u ul me një të tretën në 10 muaj.
Hetimet kanë treguar se Laho i ka dhënë një zyrtari të Avokatit të Shtetit, Irgen Kërçukut, shumën prej 600 mijë lekë dhe i ka premtuar 300 mijë lekë të tjera për të shmangur ankimin për një çështje pronësie. Prokuroria ka zbuluar se ryshfeti ishte dhënë për të parandaluar ankimin në Apel lidhur me tjetërsimin e 45 mijë metrave katrorë tokë publike në Gjirin e Lalzit.
Në vitin 2019, Laho mbeti i plagosur në atentatin ndaj prokurorit të Durrësit, Arjan Ndoja. Gjatë hetimeve, telefoni i tij u sekuestrua dhe u gjet një video, ku ai komunikonte me një zyrtar të Avokaturës së Shtetit për rastin korruptiv. Kërçuku, i cili e pranoi këtë, u dënua me 2 vite burg për akuzën e korrupsionit.
