Gjykata e Posaçme Kundër Korrupsionit dhe Krimit të Organizuar (GJKKO) la në fuqi masën e sigurisë “arrest me burg” për kryebashkiakun e Tiranës, Erion Veliaj, dhe biznesmenin Elman Abule. Veliaj kishte kërkuar zbutjen e masës përmes garancisë pasurore, por trupa gjykuese vendosi të mos ndryshojë vendimin.
Në seancën e sotme, Veliaj nuk ishte i pranishëm personalisht, por u përfaqësua nga avokati i tij, Ermir Beta. Ndërkaq, në sallën e gjyqit ishte i pranishëm biznesmeni Elman Abule, i shoqëruar nga avokatja Romina Zano.
Erion Veliaj ndodhet në burgun e Durrësit që prej datës 10 shkurt, ku po vazhdon hetimi i SPAK për akuzat e korrupsionit pasiv në 9 episode dhe pastrimit të parave. Ai është arrestuar me urdhër të Prokurorisë së Posaçme dhe ka kërkuar disa herë lirimin nga paraburgimi, por pa sukses.
Seanca në Apel erdhi pas ankimimit të vendimit të 23 prillit, kur gjyqtari Erion Bani vendosi të vijojë masën e sigurisë duke pranuar raportin periodik të SPAK për ecurinë e hetimeve. Avokatët e Veliaj kërkuan lirimin e klientit të tyre, duke argumentuar se nuk ekzistojnë më kushtet për mbajtjen në burg, por GJKKO nuk pranoi kërkesën.
