Dhjetëra tregtarë në tregun e Zdrales, por edhe në zonën e njohur si “Rruga e Gjerë”, shprehen se nëntë personat e arrestuar nga Policia dhe të akuzuar si grup i strukturuar kriminal dhe si gjobëvënës, nuk kanë qenë të tillë.
Tregtarët thonë se u kanë paguar atyre shuma simbolike që variojnë nga 2 mijë lekë të vjetër deri në 10 mijë lekë të vjetër në muaj për t’u ruajtur dyqanet.
Sipas tregtarëve, këto shuma parash janë dhënë me dëshirën e tyre dhe jo nën kërcënime apo presione siç pretendon Policia dhe Prokuroria për Krime të Rënda.
“Morëm vesh për arrestimet dhe na ka ardhur shumë keq, sepse ata kanë qenë shumë të rregullt me ne. Kanë qenë shumë të sjellshëm dhe nuk na kanë imponuar as më jep kaq apo aq lekë. S’ka shanse të jemi kërcënuar nga ana e tyre apo të kemi pasur ndonjë presion”, shprehet tregtari i Zdrales, Hajrullah Halilaj.
Një tjetër tregtar, Mondi Dimnaku, thotë se ka 3 dyqane për të cilët në total ka paguar jo më shumë se 10 mijë lekë të vjetër në muaj. Ai tregon se nuk ka pasur asnjë lloj presioni ndaj tij nga të akuzuarit për t’u dhënë para dhe shton se është habitur nga lajmi për arrestimin e tyre.
“Asnjëri nuk ka ardhur për të na bërë presion në dyqane. Të gjithë kemi paguar me dëshirë. Unë kam paguar 5 mijë lekë të vjetër dhe të tjerë nga 3 mijë lekë të vjetër apo edhe 2 mijë në muaj. Askush s’na ka vënë ndonjë detyrim se sa duhet që të paguajmë. 10 mijë lekë të vjetër kam paguar për tre dyqane. Jam habitur kur kam dëgjuar se janë arrestuar se na kanë ruajtur ne dyqanet”, shprehet Dimnaku.
Në të njëjtën mënyrë shprehen edhe tregtarët te “Rruga e Gjerë”, në bulevardin “Bujar Bishanaku”, që ndodhet pak më tutje se tregu i Zdrales. Dushe Rexhvelaj shprehet se ka lënë mallin e saj jashtë dhe asnjëherë nuk ka pasur probleme dhe se nuk ka pasur imponim apo kërcënime për të paguar se s’bën paratë për rojet.
“Mua s’më ka vendosur kush gjobë. Më kanë thënë a do që ta ruajmë dyqanin dhe i kam thënë po. S’më ka thënë kush se duam lekë se s’bën”, thotë Baçini. Agim Lipe thotë se ia ka vlejtur shumë prej 10 mijë lekësh të vjetër që ka paguar dhe se është i gatshëm për të paguar sërish për shkak të sigurisë që ka pasur për dyqanin e tij.
“Kanë ardhur ata djemtë që janë arrestuar për të ruajtur dyqanet. Kemi gjetur menjëherë mirëkuptim dhe unë kam paguar 10 mijë lekë të vjetër në muaj”, shprehet Lipe. (E.K/SHUPLAKA)
