Kukësi ndalet në shtëpi nga Korabi, duke regjistruar vetëm një pikë në javën e 16-të të kampionatit por vazhdon kryesimin me 32 të tilla.
Trajneri i verilindorëve, Ernest Gjoka shpreh keqardhje për pikët e lëna në “Zeqir Ymeri” ndërsa thekson që mungesa e qetësisë penalizoi skuadrën.
“Kemi keqardhje dhe mërzitje për ndeshjen. Sot bëmë një hap fals, nuk patëm qetësinë para portës, duhet të gjejmë forcën për të fituar ndeshjet e tjera. Ka ndikuar shumë mungesa e lojtarëve si Hasani, pasi sa më shumë lojtarë cilësorë në fushë bëjnë diferencën. Gjithsesi mendoj se të gjithë djemtë dhanë maksimumin ata që ishin në fushë por veçse nuk ishin të qetë aty ku ne duhej të ishim”.
