Ditën e sotme do të zhvillohet një nga ndeshjet më të rëndësishme të Kategorisë Superiore, ajo mes Kukësit dhe Partizanit. Nga kjo ndeshje padyshim që do të vendoset edhe se kush do të jetë më pranë titullit.
Për trajnerin e Kukësit, Ernest Gjoka ndeshja sot duhet interpretuar si një finale. Por në një deklaratë të lëshuar për “SuperSport” para ndeshjes, tekniku i verlindorëve ka treguar se nuk u trembet të kuqve, por se të dy skuadrat duhej të ishin të kujdesshme ndaj Skënderbeut që po priste momentin për t’i kaluar.
Për duelin e nesërm
“Mendoj që jemi gati, ashtu si kemi qenë për gjatë gjithë kampionatit gati, duke bërë maksimumin për çdo ndeshje. Edhe këtë ndeshje që është shumë e rëndësishme ndaj një rivali direkt, por e përgatisim me shumë qetësi dhe me shumë bindje për ta kaluar me sukses.
Nuk e përgatisim ndeshjen për barazim, e përgatisim si një ndeshje finale. Në një ndeshje finale duhet me patjetër të fitosh që të arrish atë objektiv që ke. Kështu që ne e kemi vlerësuar si ndeshje finale për të arritur gjithçka”.
Për formën që po kalon ekipi
“Jemi një skuadër e pathyeshme dhe kjo është meritë e të gjithë skuadrës për atë grinte dhe personalitet që ka treguar e gjithë skuadra dhe kjo na ka bërë të jemi lart moralisht. Personalisht mendoj që ne të bëjmë lojën tonë, ne të jemi të kujdesshëm, të jemi cinikë që ta bëjmë ndeshjen sa më të qartë teknikisht e taktikisht për atë që kërkojmë.
Partizani është rival i denjë, nuk është çështje individi, është çështje kolektiviteti dhe skuadre. Kam shumë respekt për Partizanin sepse duke pasur respekt për skuadrën kundërshtare ke respekt edhe për djersen dhe punën tende. Por droje nuk kemi”.
Për thumbimet e Malotës
“Nuk kam përgjigje për të. Sigurisht që çdo lojtar i jep skuadrës së tij moralin dhe forcën dhe shumë mirë ka bërë. Por mos harrojmë që ne jemi një skuadër që po bëjmë mirë gjatë gjithë sezonit, kemi dy sulmues si Pejiç dhe Emini. Po t’i mbledhësh bashkë, janë shumë gola. Mendoj se kemi lokomotivën më të fortë të skuadrave shqiptare sa i përket sulmit”.
Për ambiciet e titullit
“Kam shumë besim dhe e mbështes në dy pika. E para është që ekipi, e gjithë skuadra, për 10 muaj kanë dhënë e sakrifikuar për këtë objektiv. E dyta është se besoj te personaliteti dhe përvoja e skuadrës, i ka të gjithë komponentët për të dalë kampion.
Skënderbeu? Është në garë dhe personalisht mendoj që është i frikshëm sepse po pret me padurim të gabojë dikush nga ne për të na goditur”.
Discussion about this post