Luan Rama nuk i ka kursyer akuzat ndaj kryetarit të PS njëkohësisht kryeministrit. Në konferencën për shtyp, ai i bëri të qartë se Edi Rama e ka mbyllur përfundimisht raportin me LSI-në.
Ai i dha përgjigje për pjesën e “tepsisë”, hipotekave, për kryebashkiakun e Vorës, Fiqiri Ismailin, për reformën në drejtësi, duke u bërë thirrje qytetarëve që më 25 qershor të votojnë për të lënë në analet e historisë të gjithë ata që përdorin instrumentët e shtetit për pushtet.
“Me shumë hipokrizi dhe me mashtrim të plotë në raport me të vërtetën, kryetari i Rilindjes tha sot në Vorë se sot janë 3000 familje që nuk kanë marrë hipotekat duke thënë se kjo është çështje e tepsisë.
Qëllimisht po e fsheh të vërtetën. Kjo ka të bëjë me faktin se hipotekën në qarkun e Tiranës, Durrës, Vlorë, Elbasan, 80% të vendit, e kanë njerëzit e emëruar prej tij. Unë i ftoj të 3000 familjet të Bashkisë së Vorës, që të paraqiten nesër të marrin aktet e bashkisë meqënëse tani e ka zotëria në fjalë gjithë pjesën e tepsisë.
Përgjegjësi i emëruar të bëjë gati shkresat e t’ua japë për të dëshmuar që e bëjnë. Tha që e paska ndihmuar Fiqon që të bëhet kryetar i bashkisë dhe sot i kërkon Fiqos të kthejë roston duke dhënë votat për Rilindjen.
Kjo vetëm sa vërteton atë që unë e kam denoncuar. Atë që ndodhi në Pogradec, në Roskovec. Tani na del që paska ndihmuar dhe Fiqon. Natyrisht, me hipokrizi ai ka marrë pjesë në disa takime elektorale, por ka ardhur vetëm sa për fasadë se dhe aty bëri atë që bëri Bashkitë e tjera.
Gjuri i këputur i Rilindjes, tha se gjatë 4 viteve të qeverisjes, ai tha se ka ndihmuar vetëm me votat e saj për reformat, të tjerat i ka bërë vetëm Rilindja. Më lejoni t’iu kujtoj reforma në drejtësi. Rama donte që reforma të bëhej aneks i Rilindjes. Ai dhe gjithë shqiptarët e dinë po aq mirë se ka qenë vetëm këmbëngulja, rezistenca, kontributi i LSI-së u miratua dhe u koncesua vetëm falë këmbënguljes së LSI-së dhe në mënyrë të veçantë të Ilir Metës.
Ju e keni gjithçka të regjistruar, jepjani shqiptarëve dhe tregoni se kush gënjen, kush është hipokriti.
Ka një problem kryetari i Rilindjes, problemi i raporteve me Rilindjen se me LSI-në i ka mbyllur përfundimisht. Qytetarët do ndëshkojnë këtë klloun të mashtrimit dhe të hipokrizisë. Po përdor një tufë banditësh për të manipuluar votat. Ashtu siç bëri deklaratën ndaj policisë. 25 qershori është dita e ndëshkimit dhe vettingut ligjor për atë që e mbushi parlamentin me banditë. Dita kur qytetarët do të dënojnë Ramën.
Nuk ka shqiptar qoftë me katër klasë shkollë, ç’do të thotë fjala “të marrësh” dhe çfarë kuptimi ka kur kryeministri ua thotë policëve. Ka ndodhur njëherë në 1996-ën. 25 qershori ditë historike, për t’i treguar vendit e për t’i lënë në analet e historisë të gjithë ata që përdorin instrumentat e shtetit për të marrë votën.”, u shpreh ndër të tjera Luan Rama.
(XH.A/SHUPLAKA)
Discussion about this post