Gjykata e Shkodrës ka dhënë masën e arrestit të shtëpisë për ish-deputetin Bardh Spahia, i cili u arrestua të enjten. Ky vendim është pritur me protesta nga ana e demokratëve, ku ish-deputeti Flamu Noka deklaroi se ky ishte një gjyq politik.
Mbi Spahinë rëndon akuza për mosbindje ndaj urdhërit të policisë. Duket se Spahia do të jetë shembulli i parë, për atë që pret demokratët dhe qytetarët në rast se do të ketë tentativa për të pasur zgjedhje në 30 Qershor.
“Protestuesit kanë vepruar sepse nuk mund të lejojnë që të uzurpojnë një objekt publik pronë e bashkisë shkodër nga ana e policisë dhe njerëzve të paautorizuar. Për këtë kemi marrë informacion ngaqytetarët se kishte tension, dhe jemi drejtuar për atje, në mënyrë që të kërkonim që situata të qetësohej”, u shpreh Spahia brenda sallës së gjyqit.
Ndërkohë që sipas asaj që ka deklaruar prokurori i ccështjes, Spahia ka kundërshtuar punonjësit e policisë.
“Policia ka thirrur përforcime dhe janë bërë rreth 100 efektivë. Fillimisht kanë qenë 30-40 persona. Dhe më pas duke parë se po vinin njerëz nga Pallati i Sportit, janë kërkuar përforcime.
Pas kqyrjes së vendit të ngjarjes dhe pasi janë bërë veprimet para hetimore, ka rezultuar se Bardh Spahia, Nikolla Marku dhe Chodet Amuli kanë qenë me njerëzit në vendin e ngjarjes. Është parë se Bardh Spahia ka kundërshtuar policinë.
Janë marrë filmimet nga media, duke u futur në ambientet e shkollës. Është parë që pasi është hapur kordoni i policisë, i dyshuari Spahia ka qenë aktiv. Policia ka thirrur me zë të lartë, dhe i ndaluari nuk ka dëgjuar thirrjen e policisë për të ndaluar. Për këtë është proceduar”, ka qenë arsyetimi i Prokurorisë.
(E.K/Faxweb.al)
