Gjykata e Apelit të Durrës ka vendosur që ish-drejtori i Burgut të Durrësit të qëndrojë prapa hekurave.
Astrit Kote u arrestua para disa javësh për shpërdorim detyre, pasi sëbashku me juristin e këtij institucioni liruan përpara kohe, ish-kreun e bandës së Durrësit, Lulzim Berishën.
Megjithatë, para pak kohësh Kote ka deklaruar se nuk ka asnjë lidhje me lirimin e Lul Berishës.
Sipas tij, numërimi i ditëve të burgut është një procedurë e juristit, Teodor Labi.
“Nuk kam lidhje me dinamiken e vuajtjes se dënimit sepse është procedure e juristit dhe jo e drejtorit të burgut. Çdo dinamikë kontrollohet formalisht nga drejtori. Raportet me zyrën juridike, janë të tilla që ricikloj dhe miratoj veprimtarinë e juristit. Personalisht nuk merrem me pjesën e dënimit të të burgosurve. Dua te di ku kam bërë falsifikim dhe kam shkelur detyrën. Nuk e ndjej veten fajtor. Nuk dua të më shohin me keqardhje, pasi jam i pafajshëm”, janë fjalët e Kotes.
Megjithatë, si Gjykata e Shkallës së Parë, si ajo e Apelit kanë tjetër mendim. Kështu Kote është i detyruar të qëndrojë prapa hekurave.
