Gjykata administrative ka ndaluar ndërtimin e hidrocentralit në lumin Vjosë. Pas ankesave të shumta të banorëve të fshatin Kutaj, gjykata ka pranuar kërkesën e tyre.
Ministria e Energjisë dhe Industrisë, e cila dha koncesionin përmes procedurave shumë të debatueshme, si dhe Ministria e Mjedisit, e cila mbikëqyr kuadrin mjedisor, nuk arritën të bindnin gjykatën, e cila vlerësoi se pretendimet e banorëve dhe të shoqatave për shkelje të shumta ligjore gjatë procesit qenë të drejta.
Për rrjedhojë, Gjykata Administrative e Tiranës pranoi aktpadinë.
Kryeministri Rama gjatë fushatës elektorale të zgjedhjeve për pushtetin vendor, pati premtuar shpalljen e luginës së Vjosës Park Kombëtar.
Në prill 2016, tenderi për dhënien me koncesion të Poçemit përfundoi me vetëm një pjesëmarrës, pra kompaninë që kishte fituar bonusin me vendim qeverie. Dhe kështu pa asnjë konkurrent kompania turke u shpall fituese.
Paralelisht me shqetësimet e aktivistëve, banorët e Luginës së Vjosës, të cilët pritet të humbasin tokat dhe të kompensohen me çmime qesharake nga qeveria për tokat e tyre, filluan të ngrenë shqetësimet. Aktivistët zbuluan shkelje të shumta, përfshirë faktin se i ashtuquajturi Studim Mjedisor shoqërues i projektit përmbante paragrafë të plagjarizuar nga studime të mëparshme, ndërsa kompania nuk e kishte zbatuar siç duhet ligjin e konsultimit publik, i cili është parakusht për miratimin e kontratës koncesionare.
Disa eurodeputetë, përfshirë zv/ presidentjen e Parlamentit Europian, Ulrike Lunacek, u angazhuan në një fushatë ndërkombëtare ndërgjegjësimi për mbrojtjen e Vjosës nga digat, një lumë që konsiderohet si i fundit lumë i egër në Europë me potencial të lartë për zhvillimin e turizmit.
Por ishte Gjykata Administrative e Tiranës e cila shqyrtoi dokumentet dhe pranoi në tërësi kërkesën banorëve dhe aktivistëve duke rrëzuar qeverinë.
Sipas gjykatës, deklaratat mjedisore janë të pavlefshme pasi ndërtimi i HEC-it do të dëmtonte ekosistemin e zonës.
“Deklarata mjedisore është e pavlefshme. Është shkelur ligji pasi nuk janë bërë dëgjese publike”, – mësohet të jetë shprehur trupi gjykues.
(M.D/Shuplaka)
Discussion about this post