Gjykata e Tiranës ka dënuar me 7 vite e 6 muaj burg ish-deputetin Mark Frroku. Ai është shpallur i pafajshëm përsa i përket vrasjes në Belgjikë në vitin 1999.
Vetë ish-deputeti nuk ka qenë i pranishëm në seancën gjyqësore. Të pranishëm ishin familjarët dhe avokatët mbrojtës të cilët deklaruan se vendimi ishte i padrejtë dhe do ta apelojnë.
Frroku është gjetur fajtor për tre akuza po jo për atë të vrasjes. Frroku dhe avokatët e tij kërkuan dje pafajësinë e tij. Kërkesë e cila është rrëzuar nga Gjykata.
Gjykata gjithashtu përveç dënimit me burg për Frrokun, dha dhe mos ushtrimin e funksioneve publike për 4 vite, pas shlyerjes së dënimit.
Akuzat:
1-Pastrim parave
2- Fshehje pasurie
3-Ndërtime pa leje
Menjëherë pas kësaj avokati i tij u shpreh se çështjen ata do ta apelojnë në apel. Kjo është një nga çështjet gjyqësore më të gjata në vendin tonë.
“Unë e ndiej vetën të pafajshëm. Jam mbajtur padrejtësisht në burg për dy vjet. Dua vetëm të shkoj te familja ime. Kam besim te ju dhe drejtësia”. Këto ishin fjalët e fundit të ish-deputetit Mark Frroku, thënë në Gjykatë dje para se trupi gjykues i gjykimit të tij të tërhiqej në dhomën e këshillimit për vendimin përfundimtar.
Përmes një materiali voluminoz, avokatët Vladimir Meçi dhe Tonin Prendi kërkuan pafajësinë e klientit të tyre, duke pretenduar se ai nuk ka konsumuar asnjë nga veprat penale për të cilat akuzohet. Në përfundim të avokatëve, ish-deputeti përsëriti edhe një herë faktin se nuk ka kryer asnjë vepër penale. “Kam dy vjet që mbahem në burg për vrasjen e një personi të cilin nuk e kam parë ndonjëherë me sy. Madje, as një foto të tij nuk kam parë”, tha Frroku. (E.K/SHUPLAKA)
Discussion about this post