Ish-Ministri i Brendshëm Fatmi Xhafaj ka deklaruar sot nga foltorja e Kuvendit se gjykatësit që po presin procesin e Vetingut, janë duke bërë namin me vendime skandaloze në këmbim të ryshfeteve, ndërsa paralajmëron maxhorancën të mbajë larg interesat klienteliste në dëm të reformës në drejtësi.
“Një pjesë e atyre që janë në pritje të Vetingut, pa asnjë droje morale dhe ligjore e kanë kthyer dhënien e drejtësisë në një shërbim ryshfetesh skandaloze“.
Ndërkohë ish ministri i ka bërë thirrje KPK-së që t’i vlerësojë denoncimet e qytetarëve dhe se largimi i këtyre gjyqtarëve duhet të shoqërohet dhe me procedime penale.
“Për këta syresh largimi nga sistemi duhet të shoqërohet me procedime penale e sanksione të tilla. Ndaj KPK duhet ti mirëpresë denoncimet e qytetareve ndaj këtyre të pafytyrëve që po e keqpërdorin sistemin edhe në grahmat e tyre të fundit”, tha ai
Po Xhafaj nuk la pa shigjetuar dhe maxhorancën ku bën pjesë duke deklaruar se:
“Asnjë interes i yni politik apo personal, nuk duhet të ndikojë sadopak në përpjekjet për zbatimin drejtë të reformës në drejtësi. Ne duhet të kujdesemi për të mbajtur larg këdo që edhe brenda nesh ka interesa klienteliste të momentit në këtë proces”.
Xhafaj gjithashtu nuk harroi dhe opozitën duke i faturuar kostot e deformimit dhe humbjes së kredibilitetit të kësaj reforme.
“Lidershipi politik i opozitës jashtë sistemit vazhdon të tentojë ta deligjitimojë e dekurajojë procesin me shpresën e cenimit të kredibilitetit dhe deformimit të mundshëm të tij. Qytetarët shqiptar kanë gjithë të drejtën të na shohin si ideator dhe realizues të kësaj reforme historike, por aq edhe si garantë të paanshmërisë, objektivitetit dhe eficensës së saj”.
Ndërsa ish-ministri Fatmir Xhafaj, kryetar i Komisionit të Posaçëm në Drejtësi, në fund të fjalimit të tij të gjatë,duket se çoi dhe një mesazh tek kryetari i qeverisë, Edi Rama duke i ‘këshilluar’ shpërndarjen e pushteteve në mënyrë të balancuar.
“Një qeverisje të mirë për qytetarët nuk mund ta garantojnë pushtetet e përqendruara, por ato të balancuara dhe të kontrolluara, nuk mund ta garantojnë individët sado të zotë e qëllim mirë qofshin, por institucionet e forta mbështetur në respektimin e kushtetutës dhe ligjit”, tha ish-ministri Xhafaj.
