Zëdhënësja e qeverisë dhe minstrja e Shtetit për Marrëdhëniet me Parlamentin Elisa Spiropali në një deklaratë për mediat për të folur mbi reagimet e delegacionit të PE-së në Tiranë, shprehu falenderimet ndaj tyre.
Ndër të tjera Spiropali theksoi se kërkesa e opozitës për qeveri tranzitore është e padiskutueshme, duke u referuar dhe në deklaratat e delegacionit të PE-së.
“Delegacioni foli troç fare duke rrënuar pikë për pikë cdo pretendim absurd për qeveri tranzitore e parlament jo legjitime.”- tha Spiropali.
Spiropali gjithashtu përsëriti kërkesën e maxhorancës për dialog me opozitën, pasi nuk mund të mbahet peng integrimi i vendit për në Bashkimin e Europian.
“Janë arratisur nga detyra duke u dhënë krahëve të dëshpërimit, bëjnë gjëra të dëshpëruara. Gjynah vërtet, Shqipëria dhe shqiptarët nuk e meritojnë këtë për hir të karrierës së Lulzim Bashës dhe frikës që ai ka për drejtësinë. Kjo është koha për të qenë bashkë. Dhe jo rasti për të bërë kamikazin që të hidhet në era hapja e negociatave me BE-në.
Opozitën nuk e zgjedhin ne, por ne e mbajmë dorën e shtrirë ndaj saj, edhe pse sot ajo është marrë peng nga persona që e kthyen grupin në kuvend në një grup të arratisur nga detyra. Ne e vlerësojmë mbështetjen që PE i jep vendit dhe i falenderojmë eurodeputetët, që shtëpinë e përbashkët e duan në BE jo në oborrin e Bashës dhe Kryemadhit. Mes misioneve raportuese dhe mbikëqyrëse, eurodeputetët kanë kuptuar cdo aspekt të progresit, e dinë se kemi ende shumë për të bërë por nuk impresionohen nga fabulat me skandale dhe përmbysje imagjinare, delegacioni foli troç fare duke rrënuar pikë për pikë cdo pretendim absurd për qeveri tranzitore e parlament jo legjitime. Parlamenti dhe qeveria është zgjedhur me votë dhe problematika e tyre nuk e vë në asnjë diskutim rezultatin. Përgjimet i takojnë gjykatave jo kuvendit, bojkot dhunë dhe djegia e mandateve janë të papranueshme”- tha Spiropali.
