Në seancën gjyqësore të sotme ndaj Denis Shtrazës që akuzohet për vrasjen e Gazmend Çollakut, ka qenë e pranishme edhe e fejuara e viktimës Çollaku.
Ajo ka folur për raportin mes të akuzuarit për vrasjen dhe viktimës, si dhe ç’ndodhi përpara se i fejuari i saj të vritej.
E fejuara e Gaz Çollakut rrëfeu se nuk ishte në dijeni të konfliktit mes tyre, të cilët njiheshin me njëri-tjetrin pasi ishin në një lagje. Ditën e vrasjes, ajo kishte qëndruar me Gazmend Çollakun për të drekuar në Golem dhe më pas ishin ndarë deri në momentin që ajo kishte mësuar për vrasjen e tij.
“Drekuam në Golem dhe erdhëm në Durrës, ku pasi mbërritëm në Durrës u ndamë. Më vonë Gazi nuk po më përgjigjej në telefon, shkova tek lokali dhe aty mora vesh për ngjarjen. Nuk e dija që Gazi kishte konflikte me Denis Shtrazën, ata njiheshin, ishin në një lagje.”, mësohet të ketë dëshmuar ajo.
Gazmend Çollaku u vra rreth një vit më parë, në Janar të 2016-ës. Pas nje hetimi intensiv, forcat policore bënë të mundur identifikimin dhe ndalimin e 33-vjeçarit, Denis Shtraza nga Durrësi, si një nga të dyshuarit e rrëmbimit dhe më pas të vrasjes së Gazmend Çollakut. Ai u kap teksa po largohej nga Shqipëria, duke përdorur aeroportin e Rinasit.
(XH.A/SHUPLAKA)
