Ka nisur sot seanca gjyqësore për padinë e Rovena Gashit ndaj kryeprokurores së përgjithshme të përkohshme, Arta Marku. Në këtë seancë Rovena Gashi, përfaqësohet nga avokati Çlirim Gjata, ndërsa Marku nga juristja Pranvera Gruda, por ajo që bie në sy është fakti se gjatë procesit mungon avokatura e shtetit.
Rovena Gashi paditi Arta Markun pasi u largua nga puna ku mbante postin si Drejtoreshë e Sektorit të Dekriminalizimit në Prokurorinë e Përgjithshme. Në padinë e depozituar në Gjykatën Administrative, Gashi pretendon se Kryeprokurorja e ka larguar nga detyra pa motiv.
Avokatja e kryeprokurores ka kërkuar rrëzimin e padisë, pasi sipas saj është e pabazuar në prova dhe nuk eshte shkelur ligji.
“Nuk është shkelur asnjë ligj. Informacioni që Rovena Gashi çoi në KQZ për dy deputetet Aqif Rakipin dhe Gledion Rahovica pa u konsultuar me prokuroren Arta Marku solli edhe lirimin nga detyra te Rovena Gashit. Kjo i është komunikuar verbalisht Gashit”, ka thënë avokatja e kryeprokurores.
Por avokati i Rovena Gashit, Çlirim Gjata tha se nuk është zbatuar procedura për lirimin nga detyra dhe është kërkuar të dëshmojë në gjyq vetë kryeprokurorja Arta Marku.
“Problemi qëndron se cilat janë kompetencat e kësaj kryeprokuroreje. Çështja e procedurës rezulton se nuk është zbatuar. U tha se është njoftuar verbalisht për shkarkimin dhe kjo është e paqartë. Pra për herë të parë u tha sot motivacioni se pse u lirua nga detyra Rovena Gashi, pra për shkak se dërgoi emrat në KQZ për dy deputetë për t’u hequr mandati se preken nga dekiminalizimi. Ne kemi bërë një kërkesë që duhet të vijë vetë kryeprokurorja që të sqarojë dhe të përballet vetë se çfarë ka bërë. Lirimi nga detyra i Rovena Gashit është i paligjshëm”- tha avokati Gjata.
Seanca e radhës gjyqësore do të mbahet në 13 shkurt.
(M.Q/Faxweb)
Discussion about this post