Gjyqtarët dhe prokurorët të paqartë për Vettingun, zbatimi i ligjit mund të ketë të papritura

Pavarësisht se Ligji i vettingut ka hyrë në fuqi, zbatimi i tij mund të ketë të papritura.

Sipas televizionit “Top Channel”, ligji dhe vendimi i Gjykatës Kushtetuese mund të interpretohen në mënyra të ndryshme.

Që pas rrëzimit të kërkesës së PD-së nga Gjykata Kushtetuese, dyert e Inspektoriatit të Pasurive dhe Drejtorisë për kontrollin e figurës janë hapur sërish.

Kjo në mënyrë që gjyqtarët dhe prokurorët të dorëzojnë formularët e kërkuar nga ligji i vettingut, për të deklaruar të dhënat e tyre.

Sipas ligjit zyrtarët kanë 30 ditë kohë për dorëzimin e tyre, por 18 ditë janë konsumuar para pezullimit.

Gjithashtu, Gjykata Kushtetuese i detyron organet e kontrollit të pasurisë dhe të figures, që të nisin punë vetëm pas ngritjes së insititucioneve të reja të vettingut.

Kështu, gjyqtarët dhe prokurorët janë të paqartë për kohën kur duhet t’i dorëzojnë dokumentet.

Megjithatë, Top Channel shkruan se disa zyrtarë kanë pohuar se dorëzimi i formularëve do të bëhet brenda 12 ditëve të mbetura, kjo për të mos rrezikuar nga çfarëdolloj interpretimi që mund t’i bëhet ligjit apo vendimit të Gjykatës Kushtetuese.

Ende nuk është dhënë një datë përfundimtare për afatin e dorëzimeve të formularëve, pavarësisht se prej tyre varet ndërprerja ose vazhdimi i karrierës së zyrtarëve të drejtësisë. Asnjë nga dy institucionet për pasurinë dhe kontrollin e figures, nuk ka asnjë udhëzim të ri pas vendimit të Gjykatës Kushtetuese. (D.D/Shuplaka)