Pas kryeprokurorit Adriatik Llalla, gjyqtari i Shkallës së Parë të Tiranës, Artan Lazaj, është ndër të parët mes atyre që bëjnë pjesë në të ashtuquajturën “Listën e zezë”, i cili ka folur live për çështjen e revokimit të vizave nga ambasada amerikane.
I ftuar në emisionin “Top Story”, Lazaj foli për përvojën e tij personale sesi e mori vesh që nuk i lejohej më të hynte në SHBA.
“Lajmin e mësova ditën e enjte. Të mërkurën u telefonova nga Ambasada Amerikane dhe më thanë se më kërkoi konsulli një takim. Kujtoja se do të flitej për reformën në drejtëi me konsullin, por u përballa me një nëpunës, bashkë me shumë kolegë të tjerë. Ajo listë është shumë më e gjatë. Janë mbi 70 mesa di unë. Më kërkuan pasaportën dhe pas disa minutave ma kthyen dhe më thanë që viza është refuzuar me shkakun kemi disa informacione”, tha Lazaj.
Ndërkohë gjyqtari tha se kishte udhëtuar vetëm dy herë në SHBA, por herën e tretë që kishte tentuar ta bënte sërish, atij i ishte anuluar viza.
“Do të ishte hera e tretë që do të udhëtoja në Amerikë. Mua më anuluan vizën, familjes jo. Çudia ime janë arsyet se të fton konsulli dhe të pret nëpunësi i thjeshtë i ambasadës dhe mënyra joetike e të sjellurit”, tha ai.
Sakaq, Lazaj tha se nuk i kuptonte arsyet e revokimit të kësaj vize, pasi ai nuk ka bërë ndonjë shkelje.
“Unë nuk e shoh veten tek ato shkaqet që thotë Ambasada Amerikane për refuzimin e vizave. Nuk di të kem ndonjë shkelje në detyre për 23 vite gjyqtar. Nuk kam asnjë masë disiplinore ndaj meje”, deklaroi Lazaj.
Sipas gjyqtarit Lazajt, janë të tjerë kolegë të tij që nuk e meritojnë të jenë në sistemin e drejtësisë.
“Nuk duhet të ngatërrohen të gjithë, jo të futen të gjithë në një thes. Shoqëria jonë është një shoqëri e sëmurë, si gazetaria, qeverisja qendrore, vendore, mjekësia e të tjera. Drejtësia është fundi i hallkës, ku përplasen të gjitha problematikat e këtij vendi, por është pjesa më e rëndësishme. Ka nga ata kolegë që e meritojnë të mos jenë pjesë e sistemit të drejtësisë, pastaj nëse duhet të jenë të vlefshëm për viza në Amerikë, këtë se vendos unë. Ka të paaftë, ka të korruptuar, por një pjesë e shëndoshë e sistemit është goxha e ndershme dhe profesioniste”, tha gjyqtari. (D.D/Shuplaka)
