Gjyshi i 17-vjeçarit Devi Lala, i cili vrau me thikë bashkëmoshatarin e tij Anxhelo Gjakozaj, shprehet se familja dënon ashpër veprimin e adoleshentit.
Duke theksuar se nuk e dinë shkakun e konfliktit që rezultoi fatal për 16-vjeçarin, Frrok Lala shprehet se familja e tij ndjen të njëjtën dhimbje me familjen e adoleshentit të vrarë.
“Jemi shumë të indinjuar, dënojmë ashpër veprimin e nipit tonë. Iu kërkojmë falje familjes që humbi djalin e tyre. Nuk kemi dijeni se përse janë zënë djemtë. Ndjejmë të njëjtën dhimbje si prindërit e viktimës, pavarësisht se arkimorti është në familjen e tyre”,- shprehet i moshuari.
Për Frrok Lalën, nipi nuk e ka mbështetjen e familjes dhe duhet të marrë dënimin e duhur nga drejtësia.
“I kemi kërkuar falje dhe u kërkojmë edhe falje publike për veprimin e nipit tonë. Nuk e mbështesim nipin, duam të marrë dënimin e merituar nga drejtësia”,- thotë ai.
Në Spitallë të Durrësit, familja Lala nga Sukthi jeton shumë pranë familjes Gjakozaj nga Oroshi i Mirditës. Deri mesditën e djeshme fqinjë të mirë, ndërsa sot një ditë pasi djali 17-vjeçar i Lalajve, Devi Lala qëlloi me thikë duke i shkaktuar vdekjen bashkëmoshatarit të tij Angjelo Gjakozaj, ata janë kyçur në shtëpi.
Një makinë policie qëndron në lagje dhe po mban nën mbikëqyrje dy familjet, për të mos lejuar ndonjë konflikt të mundshëm mes tyre.
(E.K/FAXWEB)
Discussion about this post