Gjysmë kile hashash në shkollën 9-vjeçare në Tiranë, nxënësit prej 3 ditësh drogën me vete

Dy adoleshentë u vunë në prangat e policisë së Tiranës në praninë e prindërve dhe psikologes, nën akuzën e shpërndarjes së lëndëve narkotike.

Kjo pas sasisë së konsiderueshme të drogës që u gjet në shkollën 9-vjeçare “Avni Rustemi” në Tiranë. “Më datë 16.02.2017, në prani të psikologut dhe prindërve u arrestuan në flagrancë shtetasit: M. B dhe F. H, të datëlindjes 15 vjec dhe 16 vjeç banues në Tiranë, sepse ju gjetën e sekuestruan 440 (katërqind e dyzetë) gram me gjithë amballazh, bimë e dyshuar narkotike e llojit Cannabis Sattiva.”, bëhej me dije në njoftimin e policisë.

Por një tjetër fakt shqetësues është detaji më i fundit i grupit hetimor. Mësohet se dy të ndaluarit nga policia, lëviznin prej tri ditësh me drogë me vete, duke e fshehur atë sa në shtëpi edhe në shkollë.

Madje flitet se ata edhe kanë debatuar se cili prej tyre do ta mbante në shtëpi, pasi druheshin se mos zbuloheshin nga familjarët.

Burimet të policisë bënë të ditur se droga dyshohej se do të shitej në doza të vogla nga dy nxënësit e shkollës “Avni Rustemi”, për llogari të një personi tjetër që ende nuk është identifikuar. Bëhet fjalë për një shtetas nga Burreli që dyshohet se ka përdorur dy nxënësit e klasës së nëntë pasi ata i kanë thënë se kishin mundësi ta shisnin hashashin. Policia po punon për identifikimin dhe kapjen e këtij personi. (XH.A/SHUPLAKA)