Një përplasje verbale brenda mbledhjes së PS-së në Peqin ka vijuar me dhunë fizike ditën e djeshme dhe jashtë ambienteve ku u mbajt zgjedhja e kryetarit të ri të degës së këtij qyteti. Persona tashmë të identifikuar kanë dhunuar me mjete të forta Bilal Hasën, administrator i Njësisë Gjoçaj. Ky i fundit përfundoi në spital me hematoma, ndërsa policia ka shpallur në kërkim sot 4 persona (mes tyre dhe 2 vëllezër) dhe ka proceduar në gjendje të lirë një tjetër.
Njoftimi i policisë:
Goditën me mjete të forta administratorin e Njësisë Administrative Gjocaj, shpallen në kërkim 4 shtetas, si dhe procedohet në gjendje të lirë 1 tjetër.
Shërbimet e Komisariatit të Policisë Peqin, pas njoftimit të marrë se disa persona kanë goditur me mjete të forta administratorin e Njësisë Administrative Gjocaj, kanë shkuar menjëherë në vendin e ngarjes.
Shtetasit që kishin goditur administratorin e Njësisë Administrative, sapo kanë parë Policinë janë larguar menjëherë.
Specialistët për Hetimin e Krimit në Komisariatin e Policisë Peqin, bënë shpalljen në kërkim të shtetaseve E. M., 30 vjeç, Xh. M., 23 vjeç, A. M., 32 vjeç, (vëllezër) dhe K. S., 35 vjeç, banues në Peqin dhe vijon puna për kapjen e tyre.
Gjithashtu, u procedua penalisht në gjendje të lirë edhe shtetasi N. M., 61 vjeç, banues në Peqin.
Këta shtetas, në bashkëpunim me njëri-tjetrin, në qytetin e Peqinit, për shkak të detyrës, kanë goditur me mjete të forta administratorin e Njësisë Administrative Gjocaj, shtetasin B. H., 29 vjeç, jashtë rrezikut për jetën.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.
Discussion about this post