Drejtoria Vendore për Kufirin dhe Migracionin Korçë vijon kontrollet intensive, bazuar edhe në analizën e riskut, me qëllim parandalimin dhe goditjen e paligjshmërive në pikat kufitare dhe zonat përreth.
1. Tentativë për kontrabandë me naftë në PKK Qafë Thanë
Në Pikën e Kalimit Kufitar Qafë Thanë, në hyrje të Republikës së Shqipërisë, shërbimet kufitare kaluan për kontroll të dytë një kamion të drejtuar nga shtetasi E. Q., 38 vjeç, banues në Elbasan. Gjatë kontrollit të detajuar në dy serbatorët e kamionit, u zbulua një sasi e konsiderueshme nafte e dyshuar si kontrabandë.
Në përfundim të veprimeve hetimore, specialistët për Hetimin e Krimeve në DVKM Korçë arrestuan në flagrancë drejtuesin e mjetit, për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”. Nafta u sekuestrua në cilësinë e provës materiale.
2. Prerje e paligjshme pyjesh në zonën e Devollit
Gjatë patrullimit në terren, shërbimet e Policisë Kufitare të Kapshticës ndaluan në aksin rrugor “Miras–Bilisht”, shtetasin E. M., 36 vjeç, banues në fshatin Miras, Devoll. Ai u kap duke transportuar 6 metër kub lëndë drusore, e cila dyshohet se ishte prerë në mënyrë të paligjshme.
Ndaj tij nisi procedimi penal për veprën “Prerja e paligjshme e pyjeve”. Automjeti dhe lënda drusore u sekuestruan në cilësinë e provës materiale.
Materialet procedurale për të dy rastet janë referuar në Prokurorinë pranë Gjykatës së Shkallës së Parë Korçë, për veprime të mëtejshme.
