Policia italiane ka vënë në pranga të paktën 11 persona, pjesë e një bande prostitucioni. Mediat italiane bëjnë me dije se të arrestuarit janë me origjinë shqiptare dhe rumune, mes tyre është dhe një prostitutë 35-vjeçare shqiptare e cila ka qenë e prekur me HIV.
Policia italiane dyshon se gruaja në fjalë ka vënë në rrezik jetën e klientëve të saj, të cilët nuk janë vënë në dijeni të sëmundjes që ajo mbart.
Gjykatësi Nicola Colantonio i Gjykatës në Pescara ka vendosur që 8 prej të arrestuarve të lihen në burg dhe 3 të tjerët në arrest shtëpie.
Karabinierët zbuluan gjatë hetimeve se banda e ushtronte veprimtarinë e saj në vende të caktuara për prostitucion, në veçanti zonën e stacionit hekurudhor. Këtu punonte edhe shqiptarja e cila rezultoi e prekur nga HIV dhe Hepatit C.
“IlPescara.it” shkruan se sipas hetuesve, banda e prostitucionit fitonte disa qindra-mijëra euro. Ndërkohë një tjetër person i dyshuar rezulton i fshehur në Rumani, ndërsa të përfshirë mendohet të jenë edhe dy italianë. (D.D/Shuplaka)
