Goditet grupi i drogërave të forta në Durrës, në pranga 39-vjeçari, 3 persona të tjerë në kërkim. Burime për ”Fax News” thonë se personat e shpallur në kërkim janë larguar jashtë vendit pasi kanë marrë informacione para se të finalizohej operacioni.
DETAJET E POLICISË:
Finalizohet operacioni antidrogë i koduar”Bridge”. Operacioni nga Specialistët për Hetimin e Narkotikëve në D.V.P. Durrës godasin një rast të drogave të forta.
Sekuestrohet Heroinë. Arrestohet në flagrancë një shtetas dhe shpallen në kërkim tre të tjerë.
Specialistët për Hetimin e Narkotikëve në Drejtorinë Vendore të Policisë Durrës në bashkëpunim me Prokurorinë e Rrethit Gjyqësor Durrës, pas një hetimi rreth 3- mujor me metoda speciale kanë bërë të mundur goditjen e një grupi që shpërndanin lëndë narkotike të llojit Heroinë. Është finalizuar me sukses operacioni antidrogë i koduar “Bridge”.
U arrestua në flagrancë shtetasi:
- Bledar Tahiri 39 vjeç, banuese në Shijak. Gjithashtu janë shpallur në kërkim dhe po punohet për kapjen e shtetasve:
- E. K. 36 vjeç, banues në Shijak;
- E. R. 34 vjeç, banues në Durrës;
- L. Ç. 39 vjeç, banues në Durrës. Më datë 14.12.2017, pas njw pune hetimore intensive dhe të mirëorganizuar, në qendër të Shijakut, shtetasi Bledar Tahiri u kap në flagrancë dhe I’u sekuestruan në cilësinë e provave materiale:
- rreth 179 gr lëndë narkotike e dyshuar e llojit Heroinë e ndarë në 30 doza.
- një peshore elektronike;
- një aparat telefoni celuar.
Nga hetimet e kryera u dokumentua me prova shkencore se shtetasit e mësipërm janë të përfshirë në veprimtari kriminale ku në bashkëpunim me njëri-tjetrin shpërndanin lëndë narkotike të llojit Heroinë në zonën e Shijakut dhe të Durrësit. Bledar Tahiri, në rolin e ndërmjetësit I’a blinte lëndën narkotike shtetasit E.K. dhe më pas u’a shiste shtetasve E.R. dhe L.Ç. kundrejt një pagese.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale:
- ”Prodhimi dhe shitja e narkotikëve” në bashkëpunim në ngarkim të shtetasve Bledar Tahiri dhe E.K. parashikuar në nenin 283/2 të Kodit Penal.
- ”Prodhimi dhe shitja e narkotikëve” në ngarkim të shtetasve E.R. dhe L.Ç. dhe E.K. parashikuar në nenin 283/1 të Kodit Penal. (E.K/FAXWEB)
