Policia Kufitare e Sarandës ka goditur një tjetër rast të dhënies ndihmë për kalim të paligjshëm të kufirit. Në kuadër të masave të shtuara për parandalimin e kësaj veprimtarie kriminale, shërbimet e Komisariatit të Policisë Kufitare Sarandë kanë arrestuar në flagrancë një 24-vjeçar që po transportonte emigrantë të paligjshëm.
Gjatë kontrolleve në aksin rrugor Sarandë–Lukovë, në vendin e quajtur “Lemi i Sofisë”, shërbimet e policisë ndaluan një automjet tip Volkswagen, me të cilin po transportoheshin disa shtetas të huaj.
Në përfundim të veprimeve hetimore, u arrestua drejtuesi i mjetit, shtetasi Muharrem Okaj, 24 vjeç, banues në Shkodër.
Sipas hetimeve paraprake, Okaj dyshohet se po transportonte emigrantët e paligjshëm kundrejt pagesës, me një mjet të marrë me qira, me qëllim për t’i ndihmuar që të kalonin kufirin dhe të hynin në mënyrë të paligjshme në vendet e Bashkimit Europian.
Automjeti është sekuestruar në cilësinë e provës materiale, ndërsa vijojnë hetimet për identifikimin e personave të tjerë të përfshirë në këtë rrjet të trafikimit të emigrantëve.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme ligjore, nën akuzën për veprën penale “Ndihma për kalim të paligjshëm të kufijve”.
