Ditën e djeshme në sfidën e basketbollit për meshkuj Teuta-Tirana ka patur një incident të rëndë midis basketbollistit të Tiranës dhe një prej arbitrave.
Bruno Daliu i është afruar arbitrit Jurgen Muho duke u konfliktuar me fjalë dhe më pas ka ushtruar dhunë fizike ndaj tij. Është dashur ndërhyrja e basketbollistëve të tjerë për të shuar sherrin midis tyre.
Pas sherrit sfida vazhdoi normalisht, ku Teuta triumfoi ndaj bardhebluve me rezultatin 90-75.
Ndërkohë ditën e sotme, është arrestuar basketbollisti Daliu, i cili ushtroi dhunë ndaj arbitrit.
Njoftimi zyrtar:
Arrestohet në flagrancë një 34 vjeçar për veprën penale “Goditja e sportistit,trajnerit, arbitrit e ndërmjetësit sportiv”.
Specialistët për Hetimin e Krimeve në Komisariatin e Policisë Durrës, arrestuan ne flagrancë shtetasin:
B.D., 34 vjeç, banues në Tiranë.
Ky shtetas gjatë ndeshjes së basketbollit Teuta-Tirana, zhvilluar në pallatin e sportit “Ramazan Njala”, ka goditur me grushta gjyqtarin e ndeshjes, shtetasin J.M.,26 vjeç, banues në Tiranë.
Materialet i kaluan Prokurorisë së Rrethit Gjyqësor Durrës për veprime të mëtejshme.
