Në kuadër të një operacioni të përbashkët mes SPAK dhe Prokurorisë së Barit, me mbështetjen e Eurojust, u ekzekutuan sot 52 masa sigurie ndaj pjesëtarëve të tre grupeve kriminale që vepronin në Shqipëri dhe Itali.
Në total janë proceduar 40 shtetas shqiptarë dhe 12 italianë, të përfshirë në trafik ndërkombëtar droge dhe pastrim parash. Hetimet kanë dokumentuar mbi 40 raste trafiku dhe sekuestrim të mbi 255 kg heroine dhe kokaine.
U sekuestruan pasuri të shumta në të dy vendet, përfshirë kompani ndërtimi, biznese, apartamente, automjete luksoze dhe llogari bankare. Vlera e transaksioneve të drogës të dokumentuara shkon në mbi 4.5 milionë euro, ndërsa janë identifikuar edhe transfertat për blerje kokaine në Amerikën Latine.
Autoritetet vijojnë hetimet për të zbuluar bashkëpunëtorë të tjerë. Të gjithë të proceduarit gëzojnë prezumimin e pafajësisë deri në një vendim të formës së prerë.
