Goditja në tru është shkaktari i katërt kryesor i vdekjeve në të gjithë botën. Ajo shkaktohet nga mpiksja e gjakut ose rrjedhja e gjakut në tru dhe mund të çojë në paaftësi afatgjatë.
Në shumicën e rasteve ndodh në njerëzit e moshës mbi 45 vjeç. Është shumë e rëndësishme të dihen shkaqet e kësaj sëmundje për të parandaluar pasojat e rënda që ajo sjell (mund të çojë deri në vdekje nëse nuk merren masa që në fillim). Këto janë disa shenjat paralajmëruese të goditjeve në tru:
-Mpirje të papritur të muskujve të krahëve, këmbëve dhe fytyrës. Ndonjëherë pacientët mund të paralizohen krejtësisht dhe nuk mund të luajnë as duart.
-Çrregullim i të folurit dhe pamundësi për të kuptuar të tjerët. Pacienti nuk arrin të nxjerrë fjalët dhe është konfuz, nuk arrin t’i kuptojë të tjerët.
-Probleme me shikimin, sidomos tek njëri sy.
-Probleme me shqisat, si me të prekurit, të shijuarit, të dëgjuarit etj.
-Humbje e baraspeshës dhe kontrollit, e shoqëruar me të përziera, temperaturë ose humbje të menjëhershme të vetëdijes. Zakonisht pacientët që kanë pësuar goditje në tru nuk mund të ecin apo të qëndrojnë në këmbë.
-Humbje të refleksit.
-Dhimbje të papritura të kokës (që vijnë pa asnjë shkak). Mund të shoqërohen me humbje të menjëhershme të vetëdijes.
