Janë zbardhur dëshmitë e dy prej grabitësve të karburantëve që u vunë në prangat e policisë një ditë më parë, ndërkohë që një i tretë është shpallur në kërkim.
U arrestuan dje Klajdi Pupa 20 vjeç, i dënuar më parë për posedim të lëndëve narkotike, dhe Florian Thana, 19 vjeç, i dënuar më parë për vjedhje. Është shpallur në kërkim shtetasi me iniciale B. K. 20 vjeç.
Gjatë dëshmisë së tyre në polici, mësohet nga një portal online se dy grabitësit kanë pranuar dhe shpjeguar mekanizmin e kryerjes së grabitjeve të karburanteve.
Ata kanë treguar se grabisnin pasi ishin të papunë dhe u nevojiteshin para. Sa i përket mekanizimit të kryerjes së grabitësve, dy të rinjtë kanë rrëfyer se merrnin makina me qira për të shmangur identifikimin dhe pasi përfundonin grabitjen, makinat i kthenin në vendin ku i kishin marrë. Ata kanë rrëfyer edhe si i dhunonin rojet nën kërcënimin e armëve.
“Grabisnim sepse ishim të papunë dhe na duheshin para. Ne merrnim makina me qira në mënyrë të rregullt, që të mos pikaseshim dhe identifikoheshim. Pasi përfundonim grabitjen, makinat i kthenim sërish te vendi ku i kishim marrë. Armët dhe maskat i kishim siguruar në rrugë të ndryshme. Kemi kryer disa grabitje, kryesisht karburante, pasi ato ishin të hapura gjatë orëve të natës. Rojet dhe punonjësit i dhunonim psikologjikisht nën kërcënimin e armëve. Ne nuk kishin për qëllim të dhunonim fizikisht apo qëllonim mbi punonjësit, pasi objektivi ynë ishte të merrnim paratë e xhiros ditore dhe të iknim”, kanë deklaruar ndër të tjera. (XH.A/SHUPLAKA)
Discussion about this post